Maiatzaren 28an izan zen "Kulturartekotasun txangoak" ekimenaren aurtengo lehen irteera. Iaz abiatu zuten egitasmoa, etorriberrien komunitateari euskaratik eta feminismotik bailara ezagutarazi edota gerturatzeko helburuarekin. Dinamika sinplea da: goiz osoko ibilaldia antolatzen dute, eta Aiaraldeko herri edo ingurune bateko paisaiak ezagutzen dituzte, tokiko ekoizle edo sortzaile baten eskutik. Iazko edizioan, esaterako, Arespalditzako Soloitza gaztandegia bisitatu zuten Maroñoko urtegiaren aurretik udaberrian; eta udazkenean Orozko zein Iza okindegiko jarduna. Aurtengo jardueretan Artziniega eta Urduña zeharkatuko dituzte. Aurreneko hitzordua duela aste batzuk izan zen, eta hurrengoa urrian egingo dute, Bor-bor elkarteko kideek aurreratu dutenez.
Besteak beste, Marratik at ilustratzailearen gidaritzapean gozatu zuten Artziniegako Alde Zaharra. Ondoren, arte tailer txiki bat burutu zuten:
View this post on Instagram
Bor-bor elkarteak ekimenaren harrera eta emaitza positiboa goraipatu ditu: "Izugarria da aurtengoan ere izandako erantzuna parte hartze aldetik. Zentzu horretan, Amurrio eta Laudio herrietako EPA zentroetako kideen elkarlana azpimarratu nahi dugu, etorriberrien komunitateak bertan ezagutzen eta ahalduntzen baitira, hein batean". Aurrera begira, "Kulturartekotasun txangoak" eskaintzen jarraituko dute, baina baita beste hainbat proiektu sortzen ere, "aste honetan "Munduko sendabelarrak" sortutako jakintza eta istorioak jasotzeko ekimena aurkeztuko dugu, ezagutza eta ekimen komunitarioak sustatzeko helburuarekin".
Egitasmoa Arabako Foru Aldundiaren eta Laia Eskolaren laguntzari esker gauzatu dute.
Argazkiak: Bor-bor elkartea