Aurrera doa Bor-bor feminismo elkarteak antolatutako solasaldi zikloa. Urriaren 12an eta 22an izan ziren lehenbiziko saioak, eta azaroaren 5ean izango da hurrengo hitzordua. Hain zuzen, deseraiki beharreko beste bi gai jorratuko dituzte solasaldi eta tailer formatuan datorren larunbatean. Batetik, lodifobiaz arituko dira Ezin Kabituko kideak. Besteak beste, urrian topaketak egin zituzten Gernikan, problematika ikusgarritu, ahaldundu eta saretzeko helburuarekin. Bestetik, Amanda Verronek dekolonialiatatea izango du ardatz goizeko bigarren txandan.
Ohi gisan, 11:00etan izango da hitzaldiaren hasiera. 12:30ean, berriz, bigarren saioari ekingo diote, dekolonialitatea hizpide. Solasaldietan parte hartzeko ez da aurrez izenik eman behar, eta doakoak izango dira jarduera guztiak. Ildo beretik, umeen gunea atonduko du Bor-bor elkarteak, interesa duten ahalik eta emakume* gehien bertaratzeko. Halaber, zuzeneko itzulpengintza zerbitzua eskainiko da, beharra duen ororentzat.
Jardunaldi zein bestelako proiektuei buruzko informazio guztia labur.eus/bor-bor blogean egongo da eskura. Egitasmoa Aiaraldea ahaldunduz eta saretuz proiektuaren baitan dago, eta Arabako Foru Aldundiaren zein Laiaren babesa jaso du elkarteak jarduerak antolatu ahal izateko.