Euskararekiko eta generoarekiko ahalduntze prozesuak izango dira gai nagusia, Bor-bor Aiaraldeko feminismo elkarteak antolatutako mintzodromoan. Azaroaren 24an, ostegunean, izango da hitzordua, Aiaraldea Ekintzen Faktorian. Hain zuzen, 18:00etan abiatuko da ekintza, ikus-entzunezko aurkezpenarekin. Izan ere, eskualdeko 5 emakumeren bizipenekin eta gogoetekin euskararen transmisioan eta norberaren identitatean hizkuntzak zein generoak izandako eragina izango dute aztergai, egunerokotasuna oinarri hartuta.
Hala, Hizkuntza eta generoan ahaldunduz izenburua jarri diote ekimenari, eta bi atal izango ditu jarduerak. Batetik, aipatutako bideoa proiektatutako da lehenbizikoz, ondoren sarean eskura jarriko dena. Bestetik, mintzodromo ariketa proposatu dute, talde txikian zein handian norberaren bizipenak, gogoetak eta ahalduntzeari begirako ondorioak elkarbanatze aldera.
Ekitaldia doakoa da, eta ez da beharrezkoa aurrez izena ematea. Alabaina, Euskaraldia ere abian egonik, deialdiarekin bat egiteko deia luzatu diote Bor-bor Feminismo Elkartetik nola eragile hala norbanakoei.
Hizkuntza eta generoan Aiaraldea bor-bor proiektuaren baitan dago egitasmoa, eta Arabako Foru Aldundiaren babesa jaso du elkarteak jarduerak antolatu ahal izateko.