Urduñan kirol ekitaldi handi bat egin da aurten. Itzulia Basque Country lasterketaren irteera bat ikusi ahal izan genuen apirilaren 11n, gure izena gure mugetatik haratago proiektatu zuena, baina listo. Hala ere, hiriaren benetako eragile ekonomiko eta soziala tokiko ekitaldiak dira, gure kluben eta herritarren ahaleginetik sortzen direnak eta komunitatean arrasto iraunkorra uzten dutenak.
Itzulia iritsi zenean, Urduña giroz, bisitariz eta ikusminez bete zen goiz hartan. Ordu batzuetan txirrindularitza profesionalaren erdigunea izan zen eta gure izena hedabideetan agertu zen. Ekintza polita eta ikusgarria da, baina baita apustu garestia eta iragankorra ere.
47.000 euro bideratu zituen Urduñako Udalak Itzulia Basque Country-k Urduñan izateko irteera
Gertakizun horiek inbertsio ekonomiko handia eskatzen dute, gure kasuan 47.000€ jarri ziren udalaren diru-kutxatik, langileen esfortsu eta baliabide logistikoa handiak jarri behar dira, askotan udalerrian geratzen diren zuzeneko etekinak gainditzen dituena. Pelotoiak alde egiten duenean, oihartzun mediatikoa itzali egiten da eta bertako bizitza ohiko erritmora itzultzen da.
Aldiz, goizean edo egunean tokiko ekintzak egiten direnean, adibidez, Arandok antolatutako kros herrikoia, SC Orduñesak antolatutako Ziklo Krosa, Gualdetxu MTk antolatutako Mendi Lasterketa, Txarlazo MTk antolatutako Mendi Martxa, batzuk aipatzearren, arnasten den energia ezberdina da.
Ez dago telebista-kamerarik, baina bai ehunka pertsona gure taberna eta dendetan, animatzen, laguntzen eta kontsumitzen. Eragin erreala eta iraunkorra sortzen da, bai ekonomikoa, bai soziala. Ekitaldi horien atzean gure bizilagunen konpromisoa, boluntarioen lana eta tokiko elkarte eta saltokien inplikazioa daude. Komunitate aktibo baten isla da, egiten duen horretan sinesten duena eta kirolaren aldeko apustua egiten duena, elkartzeko tresna gisa.
Herriko elkarteek antolatzen dituzten probek eragin iraunkorragoa eta errentagarriagoa daukate
Tokiko kirola, gainera, iraunkorragoa eta errentagarriagoa da. Ez du aurrekontu handirik behar eta ez du aldi baterako eraginik sortzen; aitzitik, hurbileko ekonomia bultzatzen du eta gizarte-ehuna indartzen du. Inbertitutako euro bakoitza hemen geratzen da, udalerriko bizitzan eragin biderkatzailea sortuz.
Benetako ikuskizuna ez da urtean behin gertatzen bat-bateko eszenatoki batean, baizik eta egunero kantxetan, gimnasioetan, kaleetan eta komunitatea biltzen den plazetan.
Bertan hiritartasuna eraikitzen da, lagunak sortzen dira, balioak ikasten dira eta ametsak sortzen dira. Baliabideak espazio horietara bideratzen badira, emaitza edozein gertaera iragankorrena baino askoz iraunkorragoa izango da: komunitate batuagoa, osasuntsuagoa eta bere buruaz harroagoa izango da.
Itzuliak egun distiratsua eman diezaguke, baina gure tokiko ekitaldiek ematen digute bizia 365 egunetan
Itzuliak egun distiratsua eman diezaguke, baina gure tokiko ekitaldiek ematen digute bizia 365 egunetan. Eta Urduñak hazten jarraitzea nahi badugu, hurbilekoa zaintzea da bidea, eguneroko ahaleginaren balioa aitortzea eta kirola, ikuskizunaz haratago, komunitatea, identitatea eta etorkizuna dela ulertzea.