ELAk pauso bat aurrera eman du, eta aurpegiak, izena eta abizenak jarri dizkie langileriarentzat eredu prekario eta zekena sustatzen dutenei. Yolanda Barcina (Telefónica), Pello Gibelalde (Adegi), Alberto García Erauzkin (Euskaltel), Jose Antonio Sarria (CEN), Josu Jon Imaz (Repsol), Florentino Perez (ACS), Ignacio Sanchez Galan (Iberdrola), Gregorio Villalabeitia (Kutxabank)... dira seinalatuetako batzuk.
Badakigu ez zaiela batere gustatu. Baliteke telefonoa hartu eta gobernuko beren lagunei deitu izana... Edo, are okerrago, euskal gobernuak ofizioz jardun izana.
Edonola ere, Eusko Jaurlaritzaren Enplegu sailburu Angel Toñak aitaren batean bere elkartasuna agertu die, eta sindikatuari egindakoa aurpegiratu dio. Gure ustez beste batzuen kontura dirua erruz irabazten dutenak piratak dira.
Beste gertakari batzuetan ere prestutasun berbera agertzea gustatuko litzaiguke. Esaterako, duela bi urte baino gehiago aurkeztu genuen Legegintza Herri Ekimenean.
Zertarako aurkeztu genuen: lanaren jarraipena bermatzeko subrogazioa ezartzeko, euskal eremuko lan-hitzarmenak aplikatzeko eta baldintza-agirietan jasotakoa betetzen ez bada zigorrak aurreikusteko.
Pasa den abenduaren 4ko batzordearen ondoren argi daukagu HLEa ez dela aurrera aterako. Izan ere, gaur gaurkoz EH Bilduren babesa baino ez du jaso legegintza ekimen horrek.