Lau urterik behin egiten den bezala, heldu da gure kontzejuetako Administrazio batzarrak hautatzeko momentua. Gure herrien etorkizuna aukeratuko dugu hurrengo urteetarako.
Arabako Kontzeju Elkartetik esan dezakegu azken legealdi hau ez dela bat ere ohikoa izan gure herrietan. Pandemiak mundu osoan izan ditu ondorio larriak, eta horiek gure herrietara ere heldu dira. Ez bakarrik eguneroko lanaren barruan, baita auzokide askoren heriotzekin ere.
Bestalde, begibistan gelditu da, gauzak okertu direnean eta mugikortasun neurriak gogortu direnean, gure herriak izan direla lekurik aproposenak bizitzeko eta denbora pasatzeko, azken finean, bizitza normal bat egiten jarraitzeko lekurik ederrenak.
Guzti hori ez litzateke posible izango, urteetan zehar, kontzejuek egindako lanagatik izan ez balitz. Izan ere, Administrazio batzarrak eta kontzejuak izan dira gure herriak konpondu, zaindu eta berritu dituztenak.
Horregatik guztiagatik, hurrengo igandean, azaroaren 21ean, garrantzitsua da bozkatzera joatea, kolektibo guztietakoak, orain arte, emakumeek eta gazteek ez baitute nahi izango genukeen besteko parte hartzerik izan Administrazio batzarretan, eta hauteskunde kanpainak esaten duen bezala, denon botoa da garrantzitsua.
Aiaraldeko herrien egoera ona dela esan dezakegu. Lan haundia egin da azkenengo urteotan eta hurrengo urteetarako ditugun aurreikuspenak onak dira. Landa eremuaren jarraipena eta hobekuntza bermatuta dago gure kontzejuei esker.
Animatu guztiok eta hurreratu igandean zuen kontzejuen ordezkariak aukeratzera!
