Ur edangarriko iturria lehenbizikoz Ermun

Santa Luzia Eguna gainean dela, aurten berritasun nabarmena topatuko dugu. Izan ere, udal beharginek amaitu berri dituzte ur edangarriko iturri berriko lanak. Badira bi urte Udalak ur edangarria eramateko instalazioen obrei ekin ziela eta bertako bizilagunen etxeetan bazegoen ere, iturri publikoa falta zen. Obra txiki honekin beraz, Ermu aldean ur publikoaren zerbitzua osatzen dela esan daiteke. Isusi eta Ermu auzunetako bizilagun urrien aspaldiko eskaera zen, bertako urak osasun bermerik ez zuelako.

Iturri berria ikustean ordea, ezin ekidin ur edangarria eramateko egin ziren obrek inguruan sortutako kalteak gogoratzea. Dubirisetik Ermu aldera zihoan antzineko estarta ederra suntsitu eta 4x4rentzako pista zatarra bihurtu zuten ur hoditeria guztia sartu ahal izateko, pago, haritz eta burbuxe ale zahar bezain eder batzuk ebakiz.

Bizilagun horien oinarrizko zerbitzu horren eskubideari muzin egin gabe, galdera da ea beste modu baten ezin zen egin, ea gure herriko natur zein kultur ondarea zen estarta haren suntsiketa ezin saihestu...

Tira ba, iturri berria txukun geratu da, kareharri landuekin mimoz egindakoa eta jario oparoko bi txorrotadun iturri ("ur ez edangarriduna") zaharraren aurrean kokaturik. Mendizalearen egarria asetzeaz gainera, aurtengo Santa Luzia egunerako (eguraldia lagun), gure umeek ur jokoetan erabilgarri izan dezaten espero dezagun.