_tokikom_300x300.JPG){kind=small}
Laudioko Gaztetxeak hurrengo urtean 15 urte beteko ditu eta efemeride horri begira beroketa gisa edo, Gazte Asanbladak datorren zapaturako jardunaldia deitu du Zubiko Etxean. Leku sinbolikoan deitu ere, bertan gaztetxe zaharra egon baitzen, gure herriak izan zuen lehenengoa hain zuzen ere.
1985.urtean Altzarrate auzoan kokatutako Laudioko Skuata (“casa de pinturas”) zeritzona okupatu zuten hainbat gaztek. Egun existitzen ez den eraikin horrek (koka zaitezen, Latiorro auzoan, trenbide ondoko aparkalekuaren amaieran zegoena) jarduera handia hartu zuen bere baitan, musikaren inguruan gehien bat. Azpimarratzekoak dira ospatutako hamarnaka kontzertuak, mundu mailako hardcore eszenaren talde esanguratsuekin (NOFX, Green Day, Toxic Reasons... batzuk esatearren). Kontzertuez gain, eraikina oso handia zenez (handiegia aukeran, Maderas lantegi zaharraren langileentzako 20 etxebizitzaz osaturik ez zegoen bada!) musika taldeen entsegu lokaletarako oso erabilia izan zen.
Hala ere, bere funtzionamendu anarkikoak ez zuen lortu herriko gazteriaren sektore handi bat gogobetetzea, profil serio eta politikoago bat bilatzen zuena. Ondorioz, handik bi urteetara edo, sektore horrek Laudioko Gazte Asanblada izena hartuta, udalak lokal bat uztea lortu zuen eta Zubiko Etxean Laudioko Gaztetxea sortu zuten.
Leku aparta zen, “koketo” eta txikia, baina neurri duinekoa. Lokal soziala eskaintzeaz gain, ekimen ugariren sorburua izan zen: ikastaroak, disko eta liburu aurkezpenak, tailerrak, hitzaldiak eta baita kontzertu andana ere. Horrez gain, Gazte Asanbladak kontzertu handiak antolatu zituen Aretako frontoian, Toy dolls eta Angelic Upstarts bezalako nazioarteko talde garrantzitsuekin.
Horretan ere bitxia da gure herria: alde batetik, Skuat-a zegoen eta bestetik Gaztetxea (egun, oraindik orain, jarraipena duen joera, Orbeko-Gaztetxea tandemarekin). Eta onartu beharra dago, batez ere hasierako urteetan, harremana ez zela batere ona izan bi kolektiboen artean. Denborarekin hartu-emana zuzendu eta ekimen bateratu batzuk antolatu zituzten.
1991. urtean alkatetza eskuratu berri zuen Antonio Aiz-en obsesio handienetakoa bat herriko gazte mugimenduaren gune garrantzitsuenak desagertaraztea izan zen. Hala, tema horren ondorioz, gure herria bi urteko epean, bi "gazteleku autogestionatu" izatetik, bakar bat ere ez izatera pasa zen.
Gaztetxeari tokatu zitzaion lehenbizikoz: mehatxua, polizia bidali, gazteak jipoitu, auziperatu eta zigortu, Gaztetxea itxiz jakina. Hurrengo urtean, Laudioko Skuata-Casa de pinturas zelakoaren “txanda” izan zen, kasu honetan, operazio mediatiko-politiko-polizial baten laguntzaz, helburu berberarekin, hau da, etxea ixtea eta gazte sektore bat zigortzea.
Aurreko astean Gazte Asanbladaren kide baten deia jaso nuen, orduko gazte mugimenduko kidea izan nintzen heinean, zapaturako antolatu diren ekimenetan parte hartzeko edo. Laudioko mugimendu alternatiboaren inguruko hitzaldia antolatu zutenean edota pasa den urteko Gazte Egunari emandako kutsuarekin bezala, bere deia pozez eta ilusioz jaso nuen, Laudioko egungo gaztedi konprometituak herriko gazte mugimenduaren historia kontuan hartzeaz gain, bere egiten duela erakusten duelako. Autogestioaren bidetik, jendarte ustel honi izkin egiteko, akatsetatik eta ondo egindakoaz ikasten, aurrera egiteko adore eta indarra erakusten duelako. Goiko argazkian agertzen den moduan, azken finean, duela 20 urte Pinturaseko teilatutik Toño Aiz-i bota genion lelo hura bere horretan mantentzen delako: Izan zirelako gara eta garelako izango dira.