Ez da atzokoa arloteak edonon daudela –oxala goizeko zortzietako alboradetan baino ez baleude– eta gure inguruan badirela buruhandiak* –ez, ez naiz neure buruaz hitz egiten ari, nahiz eta onartzen dudan diametroa batezbestekotik gorakoa dela–, txoriburuak –esaterako, Amurrioko Iguarrakoa– eta, nola ez, bururik ez dutenak –esaterako, Amurrioko Iguarrakoa–.
Sanrokeetako azken egunean, kandela ziztrin bat lortzeko umeekin zein atso-agureekin borrokatu ostean eta behin kalejira bukatuta, txakurra erretzera kondenatzen dugun bezalaxe –Roketxuren Askatasunerako Plataformako kideei besarkada bana–, Odoloste egunean, sutara bidali zituzten txosnaguneko eszenatokira igo ziren pankartadunak. Zertara igo ziren? Salatzera. Zer salatzera? Txosnagunean jazotako eraso bat. Ikusitakoak ikusita eta entzundakoak entzunda, ematen du, tamalez, Harkaitz Paredes Paretas baino desfasatuago eta galduago dabilenik badela gurean, eta ez diot soilik erasotzailearengatik.
Kontu jakina da, txosnagunea jendez gainezka egoten denean eta ordu txikiek aurrera egin ahala, usaina ez dela gozoena izaten: izerdia –ohi baino gehiago–, alkohola –ohi baino gehiago– eta gonbitoren bat edo beste –ohi baino gehiago–. Ados. Baina larunbat horretan, karpari kiratsa zerion, Eau de Marqués- ek edota Gaztetxe Gucci-k ere disimulatuko ez zuketena.
Odoloste eguna zela eta, ondorioz, beste herri batzuetako gazte asko etorri zirela, herrikoek ez zietela oholtzatik jaisteko eta musika berriz jartzeko agindu, herrikoek ez zutela txisturik eta mehatxurik egin, herrikoek ez zituztela iraindu… herrikoek ez omen zutela zerikusirik izan, alegia.
Aitzakia merkeak –Latiorroko bidesaria baino merkeagoak bai behintzat–.
Anai-arrebok, laudioarrak izanagatik ere, ez gara Terentzioren eta Mari Jaiaren zita bezain perfektuak. Onar eta hausnar dezagun –dezatela– hori ere laudioarrek egina izan zela, laudioarrek laudioarrei egina eta, noski, Laudion egina.
*Galtzagorri KT, @txinatarra.ofiziala Instagram kontua, zer?
