Aiaraldea Euskaraz 2012 Luiandon ospatuko da datorren urriaren 6an, larunbatean. Egitaraua ekitaldiz lepo dator eta goizetik iluntzera arte zertan parte hartu egongo da.
Egun handiaren antolatzaileak, Aiarako Kuadrilla eta Aiaraldeko udalak dira, babesleak; Arabako Foru Aldundia eta Vital Kutxa eta jaiaren laguntzaileen artean honako hauek daude; Luiandoko Administrazio-Batzarra eta elkarteak, Aiaraldeko Berbalagunak, Fi ta Fik Euskal Soinutresnak Elkartea, AIEB (Aiaraldeko Bertso Eskolak) eta Aspaltza Elkartea.
Aiaraldeko Euskara eguneko egitarauari goizeko 11:00etan ekingo zaio euskararen aldeko adierazpenarekin, gaztetxoenek puzgarriak ere prest izango dituzte frontoian arratsaldera arte.Ordu erdi beranduago Bertso-hamaiketakoa egongo da Aiaraldeko bertsolariekin frontoian bertan eta ondoren,12:00etan, Potxin eta Patxin pailazoen bisita izango dute gaztetxoenek.
13:00etan Umeentzako tailerrak zabalduko dira Aspaltza Elkartearen eskutik. Bazkaltzeko ordua iritsi bitartean Triki-Bertso Poteoa egingo da Luiandoko tabernetan Fi ta Fik Elkartea eta Aiaraldeko bertsolarien eskutik.
Herri bazkaria antolatu dute
Herri bazkaria eguerdiko 14:30etan emango da, paella, masailak, postre eta kafearekin, 10 urte bitartekoentzat 5 € eta helduek 10 € ordaindu beharko dituzte, aldez aurretik erosi behar den bazkari-txartela ondorengo tokietan eskuratu ahal izango da; Laudioko Udaletxeko Euskara Arloan, Amurrion; udaletxean, Kultur Etxean edota AEK euskaltegian, Aiaran; Arespalditzako udaletxean edota Luiandoko Sozialean, Artziniegako Udal Liburutegian, eta Okondoko Lotxarai Okindiegian.
Antolatzaileek Herri-bazkarirako tokiak mugatuak direla gogorarazten du eta urriaren 3a izango da txartelak eskuratzeko azken eguna. Aiaraldea Euskaraz egunen azken txanpan, Dantza-Plaza emanaldia egongo da Oskizola Taldearen eskutik arratsaldeko 17:00etatik 19:00etara bitartean.