Urtero bezala, Perretxikozaleen Laudio Elkarteak ikasturte amaierako irteera antolatu du. Aurten, maiatzaren 28an elkarte horretako bazkideak eta bazkide ez direnak Arabako Labraza hiribildu harresidunera hurbilduko dira. Izan ere, Laudioko perretxikozaleek prestatzen dituzten irteeretan, beste herri batzuetako ondarea ezagutzea izaten da asmo nagusia. Ohi bezala, egitarau bete-betea izango dute Laudioko perretxikozaleek, Labraza hiribilduan bisita gidatua izan aurretik Arabako Mañueta herrira abiatuko dira. Bertan, Berzal upategian mahatsetik ardorako bidea ezagutzeko eta dastatzeko aukera izango dute.
Hamarretakoaren ostean, Euskal Herriko hiribildu harresidun txikienean, Labrazan, bisita antzeztu bati esker, hiribildu horren historiara hurbilduko dira laudiarrak. Arabako Labraza herritik Nafarroako Biana herrira abiatuko dira eta bertan beste upategi bat ezagutzeko aukera izango dute, Rioja Vega upategia hain zuzen. Arratsaldean, Biana hiriko bazterrak eta harresia ezagutzeko, bisita gidatua antolatu dute Perretxikozaleek Elkartekoek.
Irteera horretan parte hartzeko izena ematea zabalik dago maiatzaren 20ra arte elkarteko egoitzan.