Duela 13 urte Ugarteko Auzolan Elkarteko kideek lehenengo mendi ibilaldia prestatu zuten. Orduan auzune horretako zenbait bizilagunek, euskararen aldeko lasterketaren aurreko egunak girotzeko asmoz mendi ibilaldia prestatu zuten. Antolatzaileen esanetan, orduko helburuak eta gaur egunekoak ez dira aldatu. Batetik, euskararen aldeko lasterketari, korrikari, euren ekarpen xumea egin nahi izan diote urteotan eta bestetik, euren ustez, mendi ibilaldia aitzakia ezinhobea da gure ingurua, gure ondarea ezagutarazteko.
Urtero bezala, ugarteko mendi ibilaldiak aukera bi eskaintzen dizkie mendizaleei, ibilaldi handia eta ibilaldi txikia hain zuzen. Goizeko 8:00etan ibilaldi luzea Ugarteko plazatik abiatuko da eta Goikogane, Kamaraka eta Ganekogorta mendietatik ibili ostean, Ermuko larrinean atsedena hartu eta Ugarteko plazan izango du amaiera. Ibilaldi txikia berriz, goizeko 9:00etan aterako da leku beretik, Ugarteko plazatik, eta Lusurbeilandatik Ermuko larrinera joango dira mendizaleak. Ibilaldi luzean zein txikian parte hartzen duten guztiek Ermuko larrinean indarberritzeko eta hamaiketakoaz gozatzeko unea izango dute.
Ohi bezala, Aretako zenbait laguntzailek, Ermuko larrinean, hirugiharra plantxan prestatuko dute mendizaleon nekea arintzeko. Betiko moduan, Korrika mendi ibilaldian parte hartzeko izena ematea ibilaldia hasi baino 10 minutu arinago egingo da eta debalde izango da. Ugarteko Auzolan Elkartetik ere, iganderako eguraldi iragarpena eman nahi izan digute eta antza, ez da egunotako giro sargoria izango. Izan ere, termometroak behera egingo du, hodeiak ere agertuko dira baina mendian ibiltzeko giro atsegina izango dugu antolatzaileen esanetan.