Gaur, otsailak 27, Saharar Errepublika Arabiar Demokratikoaren (SEAD) aldarrikapenaren 35. urteurrena bete da. Hori dela eta, ostiralean Aiaraldeko zenbait lagun Laudioko plazan batu ziren saharar herriak bizi duen egoera salatzeko. Arratsaldeko 19:00etan hasitako elkartasun ekimenean, Saharako bandera erraldoiak lagunduta, Sahara libre! lemapean elkartu ziren. Ordu erdiko elkarretaratzearen ostean, Sahararen aldeko elkarteko kideek, Bir Ganduz-eko kanpalekutik (Aljeriako saharar errefuxiatuen kanpalekuak), Abdeslem Omar Lahsen sahararrak idatzitako gutuna irakurri zuten.
Gutun horretan, Europar Batasuneko agintariei zuzenduta, besteak beste aipatzen dira Sahara herria 35 urtez indarrez hartutako herria izan dela eta Marokok hartutako lurraldeetan saharar biztanleen giza eskubideak eta oinarrizko askatasunak sarritan urratuak izan direla. Halaber, euren baliabide naturalen arpilatzeari ekin diola Marokok, Frantziako eta Espainiako gobernuen laguntzarekin. Horren lekuko, egunotan Europako Batzordeak urtebetez luzatu nahi duen Marokorekin duen arrantza hitzarmena. Aljeriako errefuxiatuen kanpalekuetatik, gogora ekartzen digu Abdeslem Omar Lahsenek, gaur egun errefuxiatuen kanpalekuetan 165.000 saharar, desterruan, ozta-ozta bizi direla, egoera latzean.
Atzo bertan, otsailaren 26an, Dajlan -lurralde okupatuetan- Marokoko agintariek antolatutako jaialdi baten ostean milaka kolono marokiarrek, gobernuko segurtasun indarrek lagunduta, sahararren auzuneei eraso zieten. Horretarako ehunka butano-botila jaurti, kotxeak erre eta sahararren dendei eraso zieten. Hirian sortutako anabasaren ostean, makina bat sahararrek hiria utzi eta basamortura joan dira aterpe bila.