Gure inguruko sendabelarren ezagupena zabaltzeko asmoz 8 orduko ikastaroa antolatu du Laudioko udaleko gazteria sailak. Datozen asteetan tailer horretan inguruko larreetan eta mendietan topatu ahal diren sendabelarrak ikertuko dira. Izan ere, belaunaldiz belaunaldi gure aurrekoek sarritan bide bazterretara edo mendira jotzen zuten sendabelarren bila, minak arintzeko edo gaixotasunak sendatzeko.
Saio hauetan sendabelarrak ezagutzeaz eta ikertzeaz gain, landareek osasunaren mesederako dituzten ezaugarriak landuko dira. Halaber, baserrietan, landareekin eginak, ohikoak izan diren errezetak, ukenduak, olioak... egiten ikasteko aukera izango dute tailer horretako ikasleek. Sendabelarren tailerrean, Zeanuriko Gabriel Vázquez Molina ibiliko da irakasle. Eskarmentu handia duen idazle eta hizlari honek 30 urte daramatza fitoterapia eta medikuntza tradizionala ikertzen eta zabaltzen. Horren lekuko, idatzitako liburuak, "Sendabelarrak Euskal Herrian" eta "Sendabelarren magia" besteak beste.
Tailerra 18 eta 35 urte bitarteko gazteei zuzenduta dago eta izena emateko edo informazio gehiago jasotzeko Gazte Informazio Gunera hurbiltzea besterik ez dago. Ikastaroaren egutegia honakoa izango da: Martxoaren 17an, 24an, 31n eta apirilaren 7an.