Okondoko Señorio de Astobiza upategiak ekoizten duen Malkoa txakolinak "International Wine Guide 2011" izeneko nazioarteko sarietan zilarrezko domina jaso du. Aretxabala baserrian dagoen upategiak mahats-mordorik onenak aukeratu ditu Malkoa txakolina ekoizteko.Hori dela eta, ardo mota honetako 2.000 botila baino ez ditu ekoitzi. Halaber, upategi honetako arduradunak Aiaraldea.com-i esan bezala, mahats-mordoen bilketa eskuz egiten da eta horrek ziurtatzen die mahats onenen aukeraketa. Makinen bitartez mahats bilketa egiten denean, 6 bider merkeagoa izan arren, dena biltzen da eta ez da aukeraketarik egiten. Mahastietan lehendabiziko aukeraketa egin arren, upategian bertan bigarren aukeraketa egiten dute txakolinaren ekoizpenerako mahats-mordorik onenak aukeratuz.
JUpategiko kudeatzaile Jon Zubeldiaren esanetan, nazioarteko saria jaso izanak egindako lana aintzat hartu dela esan nahi du, eta euren ardoak ezagutarazteko orduan laguntzen du. Sariketa horretara, 1.502 ardo aurkeztu ziren eta horietatik 398 aukeratu ziren. Hautatutakoen artean, Bizkaiko txakolinaren jatorrizko deiturako Itsasmendi eta Getariako txakolinaren jatorrizko deiturako Txomin Etxaniz. Malkoa txakolina dastatzen dugunean lurra, klima eta mahats mota hau, hondarribi zuri, igarriko ditugu.
Arabako txakolinaren jatorrizko deiturako Malkoa txakolinak, adituen esanetan, honako ezaugarriak ditu: oso ona, sendoa, aberatsa eta arometan konplexua, ondo orekatua eta amaieran iraunkortasun ona duena. Saritu duten ardoa egiteko orduan hondarribi zuri mahats mota baino ez dute erabili. Señorio de Astobiza upategiak Aiaraldeko txakolinaren ibilbidean ere hartzen du parte eta Aiaraldeko beste upategiekin batera, upategiak bisitatzeko edo ardo dastaketa egiteko aukera eskaintzen digu txakolinaren ibilbideak.