Urtarrilean Aiaraldeko zenbait herritan VII. Sahararen aldeko euskal karabana: piztu itxaropena ekimena egin da. Aurreko urteetan bezala ekimen horren bitartez Tindufeko (Aljeria) kanpalekuetarako janari bilketa egin da. Amurrioko eta Laudioko supermerkatuetan eta ikastetxeetan janaria biltzen ibili dira Aiaraldeko Sahararen aldeko lagunak elkarteko kideak. Halaber, aurreko urteetan bezala, Aiaraldeko emakumeen elkarte biren laguntza izan dute.
Aurten Aiaraldean 940 kilo arroz, 680 kilo lekale, 300 kilo azukrea, 330 kilo hegalabur/sardina, 520 kilo pasta eta 60 kilo konpresa jaso dira. Aurreko urtean 3.100 kilo jaso zituzten guztira, aurten berriz, 2.830 kilo jaso dituzte. Urteroko janari bilketarekin batera, aurten, Metro Bilbao, Eusko Tren, E.T.S. eta Iberdrola enpresetako langile talde batek "Sahararako 200 bizikleta" antolatutako ekimenarekin bat egin dute eta 10 mendi-bizikleta jaso dituzte.
Iazko datuekin alderatuta, zertxobait gutxiago jaso arren, Aiaraldeko Sahararen aldeko elkartetik ekimenaren balorazio ona egin dute. Otsailaren 19an Bilbotik, VII. euskal karabana aterako da eta Tinduferako bidean jarriko dute jasotako laguntza.