Laudioko kultur etxean abenduaren 20ra arte Emakumeak begira argazki erakusketa dugu. Erakusketa hau CCEB (Centro cultural de España en Bata) izeneko kultur zentroan 8 emakumerekin eginiko argazki tailer baten emaitza izan da, Manuel Iradier Elkarte Afrikanistarekin elkarlanean. Euren argazki-makina txikiak hartuta, hurbil zuten emakume bat aukeratu behar zuten banaka, eta eguneko une batean argazki bat egin. Eta aho batez, gai nagusitzat betebeharren gaia hartzea erabaki zuten.
8 Argazkilariek, gainera, Nfongako Baliabideen Elkarte Integrala bisitatu zuten. Bertan, 10 emakumek lan egiten dute garapen komunitarioa sustatzeko eta hor egin ziren nekazariaren eta erizainaren argazkiak.
8 Argazkilari hauek, emakume hauek, argazki hauen bitartez ondo erakutsi digute euren herrian emakumeen eguneroko zeregina. Argazki makinaren objetiboaren atzean eta aurrean, emakume afrikarrak izan ditugu eta horrek estereotipoak baztertzeko baliagarria izateaz gain, euren ikuskera ezagutzeko aukera paregabea.
Argazkigintzaz ari garenean, azken urteotan sarri aipatzen ditugu megapixelak, argazki-makina berriek omen dituzten abantailak (irribarreak ere antzemateko gai omen dira!?) eta abarreko asmakizunak. Baina XIX. mendearen hasieratik, argazkigintzaren sorreratik hona argazkietan, bestelako artelanetan bezala, baliabideek eragin eskasa izango dute sortzen dugun hori zeozer adierazteko ez bada. Erakusketa honetan begirada benetan adierazgarriak topatuko ditugu.
Argazkilariak: Bernardita Anguesomo Ekekang, Manuela Ayang Ntonga, Eloisa Sales Ipuwa, Margarita Afang Nsono, Eulalia Abeque Obama, Victoria Kiebiyene Ndong, Juana Mbasogo Ndong eta Sinforosa Mchama Nsue Ada. Tailerraren eta erakusketaren muntaiaren atzean Mireia Fort eta argazki-edizioaren atzean, Arturo Bibang.