2011-2012 kurtsorako aurretiko izen emateko epea ireki berri du Juan de Aranoa Udal Arte Eskolak eta irailaren 8ra arte egongo da irekia Kultur etxean. Eskaintzen diren kurtsoen artean, pintura, errusiar portzelana, zur lanketa, patchwork edo ehungintza daude.
Udal Arte Eskolak hurrengo ikasturteari begira hainbat kurtso eskainiko ditu: alde batetik, irailetik eta ekainera bitartean haurrentzako, gazteentzako eta helduentzako pintura kurtsoak eta bestetik, lehenengo lauhilekoan ehozirietan kakorratz lanak, errusiar portzelana, zur lanketa artistikoa, marketeria, saskigintza, zeramika, larrukigintza, patchwork eta ehun-diseinua eta patroigintza eskainiko ditu.
Amurrion erroldatuak daudenek lehentasuna izango dute eta gutxiago ordaindu beharko dute. Aurretiko izen ematea ekainaren 13tik irailaren 8ra izango da eta eskaera gehiegi izanez gero, zozketa eta zerrenden argitalpena irailaren 12tik aurrera izango da. Matrikularen ordainketa, aldiz, irailaren 12tik 23ra izango da.
Beste alde batetik, uztailean zeramika eta eskulan tailerrak emango dira astelehenetan, astearteetan eta ostegunetan 10:00etatik 12:00etara Kultur Etxean. Izena emateko epea ekainaren 17an bukatuko da eta kurtsoak 26,60 euro balioko ditu Amurrioko auzokideentzat eta beste guztientzat 33,25 euro izango dira.