Pasa den maiatzaren 17an, asteartean, Homofobiaren eta Transfobiaren aurkako Eguna izan zen eta hori dela eta, Komiki emakumeak, umorezko marrazkigile erakusketa dago Bañueta Kiroldegian. Gaur ikusteko azken eguna da eta Lesbitoria-Gaysteiz Elkarteak antolatu du.
Komikietako hamabi emakume, dibertigarriak, heteroak, maiteminduak, amorratuak, ironikoak, lesbianak, borrokalariak, argiak, bakarrak, gazteak, ez horren gazteak...Hamabi emakumek beren bineta eta tira komikoen bitartez munduaren ikuspuntua, harreman pertsonalena, bikoteena, gizon zein emakumeen artekoa ematen dute.
Erakusketa Lesbitoria-Gaysteiz Elkarteak antolatu du eta umore grafikoaren autore euskaldunen zein espainiarren lanak biltzen ditu. Jarduera honen helburuetariko bat emakume hauen lanak ezagutzera ematea da, gizonek menperatzen duten mundu horretan emakumeek ere presentzia dutela nabarmentzea, alegia.
Pasa den martxoan, herriko liburutegian emakume komikigileei buruzko erakusketa egon zen. Bertan, komiki munduan dauden emakume egile garrantzitsuenen errepasoa egin zen, baina oraingo honetan humore grafikoa egiten duten emakumeei tokatzen zaie.