Ezker Abertzaleak Bañueta Kiroldegiaren kudeaketaren kontra dagoela azaldu du prentsa ohar baten bitartez. Beraientzat hoberena bitariko gestioa edukitzea izango zen, Udalak pisu gehiena edukiz.
Ezker Abertzaleak dio, Udalak eta kiroldegiaren administrazio-lanak daramatzan enpresak hainbat klausula indargabetu dituztela. Horrela, seigarrenak “ur, telefono, gas edo elektrizitatea gastu guztiak enpresaren esku utziko direla” dio, baina uraren %95 adibidez, Udalak ordaindu du.
Serdepor-rek, enpresa kudeatzaileak dio errentagarritasun gutxi ateratzen duela eta hori dela eta, Udalak diru-laguntzak eman dizkio. Ezker Abertzaleak ez du ulertzen zergatik gertatzen den hori kontratuak enpresak gastu guztiak ordaindu behar dituela esaten badu. “ Bañueta kiroldegiaren bazkide guztiak udako igerilekuetara doan sartu daitezke, adibidez. Horrek, udako udal-igerilekuetan 10.000 edo 12.000 euro gutxiago sartzea suposatzen du, eta diru kopuru horrekin udako igerilekuen kudeaketaren prezioa merkeagotu zitekeen”, esaten du Azker Abertzaleak.
Gauzak horrela, “Serdepor-rek, enpresa pribatuak, dirua irabazten du eta herritarrok, berriz, dirua galtzen dugu”, salatzen du.
Beste alde batetik, bazkideak ordaindu behar duten diru-kopurua handiegia dela uste dute Ezker Abrtzaleko zinegotziek. Izan ere, kuota horretan kiroldegiko zerbitzu guztiak sartzen dira, nahiz eta horiek ez erabili. Boulderra erabili nahi duenak, adibidez, 258 euroko kuota ordaindu behar du urtean, nahiz eta igerilekua edo gimnasioa ez erabili.
Ezker Abertzaleak enpresa horrekin sinatutako kontratua eta egon diren okerrak berraztertzea eskatzen du. Gainera, egungo enpresarekin dagoen kontratua ezin dela luzatu pentsatzen du, “ez dituelako herriko bizilagun gehienak asetu”.
Azkenik, Ezker Abertzaleak EA-k egindako faltsutzeak salatu nahi ditu, izan ere, enpresa honen kontratuaren luzapena Tokiko Gobernu Batzarrean bozkatu zuten, non “Ezker Abertzaleak, alkatearen berariazko debekua dela eta, ezin duen parte hartu”. Gainera, “hiru zinegotzik luzapenarekin aurrera jarraitzea erabaki dute, baina Osoko Bilkuran aurkeztu ezkero, ezetza aterako zen”.