Fibromialgia sindrome erreumatiko kronikoa da eta mina eragiten du giharretan, zurdetan, giltzaduretan eta gorputzeko beste hainbat zuntzetan. Nerbioi aldeko Fibromialgia eta Neke Kronikoaren Elkarteak (AFAN) gaixotasun hau pairatzen duten pertsonentzako hitzaldiak, jardunaldiak, formazioa eta irteerak antolatzen ditu.
Fibromialgia pairatzen duten pertsonentzat aisialdia eta euren gaixotasuna beste pertsonekin konpartitzea oso garrantzitsua da. Horregatik, hain zuzen ere, AFAN elkarteak zenbait irteera egiten ditu.
Oraingoan, EITB-ko “Aspaldiko” programara joango dira. Autobusa 14:00etan irtengo da eta programak lunch bat eskainiko du. Elkarteak, gainera, bi pertsonentzako zirkuitu termal bat zozkatuko du. Izen-ematea AFAN-ek Laudion duen egoitzan ( Villa Vieja, 6) egin dateke edo telefono honetara deitu daiteke ( 654 12 19 46). Dena doan izango da.
Fibromialgia
Gaixotasun kronikoa da eta agertu eta desagertu daiteke. Oraindik ez da haren jatorria ezagutzen, baina batik bat, emakumeek izaten dute.
Fibromialgia ondorengo sintomekin lotzen da: nekea, giltzaduretako zurruntasuna, lo egiteko arazoak, buruko mina, eskuen eta hanken sorgortzea, depresioa, antsietatea eta urduritasuna. Osasunaren Munduko Erakundeak (OME) ez zuen 1992. urtera arte gaixotasun moduan onartu eta sintomak beste gaixotasun batzuekin lotuak daudenez, askotan diagnostiko zaila du.
AFAN duela urte batzuk Laudion hasi zen eta azken urteotan Amurrioko jendea ere bildu da. Pasa den urtean, adibidez, hainbat hitzaldi eta jardunaldi prestatu zituzten, hala nola, gatazkak konpontzeko tailerra edo gaixotasun kroniko bat duen pertsona batek sentitzen duena adierazteko jarraibideei buruzko hitzaldia.