Landarearen izen zientifikoa Cortaderia selloana da, baina panpa-belarra izenarekin ezagunagoa da bere kanaberak lumak dituelako. Argentina, Uruguai, Txile eta Brasiletik etorritako landare inbaditzailea da, eta Euskal Herriko flora arriskuan jartzen ari da.
Gizakiaren ekintza zuzena da toki bateko fauna eta flora arriskuan jartzen dituen faktore nagusia, baina bigarrena landare inbaditzaileen ugalketa da. Zabarkeria edo ezjakintasuna dela eta, beste ekosistema batean landare exotikoak hazteak ondorio larriak eragiten ditu; iizan ere, bertoko landare-populazioa desagertzeak edo hibrido genetikoak agertzeak mendeetan zehar izandako eboluzioarekin bukatu dezakete.
Panpa-belarra zonalde heze eta klima epeletan jaiotzen da, eta horregatik, hain zuzen ere, kantauriar zonalde osoan dago, Asturiasetik hasi eta Gipuzkoaraino. Bere biziraupena hamar eta hamabost urte artekoa da eta haizeak lagundurik bere haziak 30 kilometrotan mugi daitezke.
Hori dela eta, Udala landare inbaditzaile hori desagerrarazteko kanpaina egiten hasi da, landarea sustraitik ateratzen, alegia. Orain arte 35 atera dituzte, baina landare horrekin akabatzeko udalerrian dauden guztiak kendu beharko dira, landa publikoetan zein pribatuetan.
Udalak deia egin die herritarrei euren lurretan honelako landareak aurkituz gero, ken ditzaten. Udaleko Ingurune Arloan informazio gehiago jaso dezakete etorkizunean elkarrekin landare honekin akabatzeko plan bat abiarazteko.