Amurrioko Kanpai Joleen Elkarteak hainbat ekintza prestatu ditu larunbaterako, horien artean ohiko kanpai jotzeak, kariloi hotsak eta Juan Antonio Alañaren aiaraldeko adar-jotzaile bandaren aurkezpena. Aurtengo kontzertuan Valentzia, Os de Balaguer (Lleida), Iurreta, Gaubea, Agurain eta Burgoko kanpai-joleek parte hartuko dute eta kanpai-jole izandako Victor Cuadra eta Jose Luis Berganzari omenaldi txiki bat egiteko asmoa dute.
Amurriokoa Euskal Herriko kanpai-joleen elkarte bakarra da eta 35 kideek osatzen dute, horien artean hiru emakume eta bost gazte. 2007. urteko uztailean sortu zen, baina urtebete lehenago, 320 kiloko kanpai bat galdatu zuten Erdi Aroan egiten zen moduan, hau da, erregai gisa egurra erabiliz. Kanpai hori, gaur egun, Murgan dago.
2006an, 25 kanpaiz osatutako kariloia jarri zuten Amurrioko parrokiako dorrean. Euskadiko handiena da eta Espainiako Estatuko seigarrena. Organoa elektrikoa du, eta edozein melodia sortzeko bide ematen du.
Kanpai Joleen Elkartearen historia
Kanpai Joleen elkarte bat osatzearena Jose Luis Albizuaren, elkartearen lehendakaria, eta haren lagunen ideia izan zen. Parrokiako kanpaiak jotzen zituzten eta Kantabriako Portilla anaiak ezagutzen zituzten, haiek baitira Aiarako kanpai askoren egileak. Harreman estu horren ondorioz, lehendabiziko kanpai hura galdatzeko proiektua sortu zen eta urtebete geroago elkartea sortu eta kideak batzen joan zitzaizkien, “kanpai-hotsak ez galtzeko”, esan zuen Albizuak.
Albizuaren arabera, “taldekideei kanpai-hotsak beste soinuekin nahastea gustatu zaie beti”. Horrela, parrokiako organoak lagunduta, kariloi-kontzertua egin zuten Laudioko musika-bandarekin, txalaparta eta kanpai doinuak nahastu dituzte eta Tibeteko goporren kontzertua ere egin zuten. Izan ere, elkartearen helburuetako bat “mundu osoko kanpai exotikoak gure artean ezagutaraztea da”, adierazi zuen Albizuak.
Egitaraua
VII. KANPAI KONTZERTUA Irailak 18 (Amurrio)
11:15 Kanpai-joleen kontzentrazioa eta izen-ematea
11:15 Hildako kanpai-joleen aldeko meza
11:30 Kalejira eta Juan Antonio Alañaren adar-jotzaile bandaren aurkezpena
12:00 Kanpaien munduaren inguruko hitzaldia eta mahai-ingurua, Antxon Agirre antropologoak emana.
13:00 VII. Kanpai kontzertua
Ohiko kanpai jotzeak
Kariloi hotsak
15:00 Kanpai-joleen arteko anaitasun bazkaria