Amurrioko Udalak blog berri bat irekiko du uda ostean, herritarrek hainbat gaien inguruan euren iritzia eman dezaten. Amurrio gogoan Udalaren baitan dagoen Herritarren Parte Hartze Sailaren eskutik dator, izan ere, otsaila eta martxoa artean egin ziren eztabaidetan oso jende gutxik parte hartu zuen.
Urte hasieran egin ziren herritarren parte-hartze jardunaldiek izan zuten arrakasta eskasa dela-eta, Udalak blog bat irekitzea erabaki du, non aldez aurretik gaiak proposatuko diren amurrioarrek horien artean bozkatu eta zein eztabaidatu nahi duten adieraz dezaten.
Oraingoz proposatu diren gaien artean, besteak beste, hiri-busa eta ikasleentzako bide seguruagoak jartzeko aukera Reforraren inguruak hobeto aprobetxatzeko ideiak edota bidegorri sarea daude.
Udalaren arabera, administrazioaren eta herritarren arteko topaguneak bultzatzeko sortu da bloga. Hala eta guztiz ere, Arkaitz San Josek, herritarren parte-hartzerako teknikariak Aiara Irratian adierazi zuenez, Udalak ez du “proposatzen den guztia aurrera aterako, baina galdera guztiak publikoki eta modu egokian erantzutera konprometitzen da”.
Herritarren parte-hartze prozesua 2006. urtean hasi zen hainbat auzoetan egindako eztabaidekin. Hasieran ekimenak arrera ona izan zuen, baina 2008. urtean Alkinar, Arenalde, Goikolar, Landako eta Santa Marina de Olarri auzoetako biztanleek uztea erabaki zuten, “denboraren luzatzeak suposatzen zuen nahigabea, adostutako arauen erabilera eza eta herriko kontseilua aktibatzeko interes eskasa” zela-eta, El Correo egunkariari adierazi zioten bezala.
EAJ-k Zabaltzen izeneko ekimen paraleloa egingo zuela esan zuen apirilean. Haren helburua herritarren parte-hartzea bultzatzea da eta aurrekoaren antzekoa da: gai konkretu batzuen inguruan taldeak egin ostean, irailean eztabaida horietatik ateratako ondorioak jakinaraziko dizkiete herritarrei eta 2011. urteko hasieran dossier bat aurkeztuko dute.