ADIEk kaleratutako azken prentsa oharra dela eta, Orozkoko BILDUk argi utzi nahi izan du bere jokaera bai Zubiaur Eraikuntzak Elkartearen aferan zein beste udal-arlo guztietan. Argitara emandako prentsa-oharrean aipatu dute orain arte mota honetako komunikazio gatazkak eta probokazioak ekidin dituztela, baina Adieren idatzian esandakoa "oso serioa eta larria" dela; "erantzuteko beharrean aurkitu gara".
BILDUren hitzetan, Zubiaur Eraikuntzak Elkarteko Kontseiluko ADIEko ordezkariek argi eduki behar dute eskubideak denontzat direla berdinak, baina kudeaketa soila denean, gehiengoak markatzen duela irizpidea edozein arloetan. Hori ez ezik, ADIEko ordezkariek Kontseiluko batzarreko hainbat akta onartu barik eta sinatu barik daudela isiltzen dutela ere salatu du Bilduk, agiri hauen legezko balioa zalantzan jarriz.
Gainera, BILDUk salatu duenez, EAJ eta Bilduko ordezkariei behin baino gehiagotan ukatu zaie kontratazio lehiaketa horren gaineko dokumentazioa ikustea eta alderdi bakoitzaren konfiantzako aholkularitzarekin ikertzea.
Bilduko ordezkari batek eztabaida beroaldi batean ahoz emandako dimisioa Adie-k aintzat hartu izana eta horren ondorioz bileretara deitu ez izana deitoratu du koalizio abertzaleak. Horrekin batera, Zubiaur Eraikuntzak kontseiluko batzarretan Bilduko ordezkariek norbait mehatxatu izana gezurra dela argitu dute. Haien aburuz, hainbat gaietan erabilitako prozedura ez da legezkoa izan eta erantzukizunik izanez gero, bestelako neurriak hartzera behartuta egongo direla adierazi du Bilduk.