Amurrioko Gazte Asanbladak gogor kritikatu du EAJren adierazpena.
Testuan diote Amurrioko Gazte Asanbladak (AGA) pasa den urteko udazkenean “Gazte Lokala” proiektua aurkeztu ziola Amurrioko udalari eta hainbat bilaren izan ondoren, erantzun konkreturik eman ez zietenez, otsailaren 3an Amurrioko Landazuri etxea okupatzea adostu zutela. Ordu erdi eta gero ertzaintza agertu zen, udalak deituta; adierazi dute. Okupazioaren harira, AGAk gogoratu du 9 gazte epaiketen zain daudela eta pasa den astean heldu zitzaiela fiskaltzaren eskaera: 2809€ko isuna gazte bakoitzeko. Guztira, 25281 euro.
AGAren hitzetan, gutuna heldu bezain pronto EAJko gobernuaren burua den Josune Irabien eta gazteen zinegotzia den Eder Sanchez erruduntzat jotzen zituzten kartela itsatsi zituzten herriko paretetan. Handik egun gutxira, EAJk komunikatu bat zabaldu zuen bere facebookean, la gazte asanblada de amurrio utiliza las amenazas que se creían olvidadas en este país izenburupean, ekainean bere burua tresna gisa agortutzat eman zuen Segi gazte erakundearekin konparatuz.
Bilduk ere oharra zabaldu du
Amurrioko Bilduk herriko gazteek planteatutako arazoei konponbidea topatzea eta gazteen kontrako kriminalizazioarekin amaitzea eskatu dio udalari. Bestalde, koalizioak gai horren berri modu ofizialean ez ematea leporatu dio EAJri, hedabideen bitartez kontatu baitute.