Datorren larunbatean, abenduaren 15an, Orozkon egingo den “Terreña arrazako Euskadiko VI. Txapelketa”-ren harira, honen osagarri izango den gastronomia astea antolatu dute.
Txapelketa Orozkoko Udalak eta Terreña Arrazako Bizkaiko Elkarteak antolatu dute Santa Luziako azokaren egitarauaren barruan. Hegoalden hartuko du lekua eta 14 ganadutegiko 71 abelburu bilduko ditu. Beraz, Orozko lehen sektoreko bilgune bilakatuko da, eta desagertzeko arriskuan dagoen okelatarako arrazaren erakustoki.
Sei ganaduzale bizkaitarrek, lau gipuzkoarrek eta lau arabarrek hartuko dute parte larunbatean eta adinaren eta sexuaren arabera ezarri diren 9 kategorietan lehiatuko dira. Horietako 3 arrei dagozkie, beste 6ak, emeei, eta bakoitzean epaileek hiru sari banatuko dituzte. Gainera, sari bereziak emango zaizkie behi txapeldunari, zezen txapeldunari, ganadutegi onenari eta hazi-jartzeko buru onenari.
Ganadu feriarekin batera, azoka ere egongo da 10:00etatik 13:00etara. Gaztak, marmeladak eta euskal pastelak izango dira besteak beste 29 salmenta-postutan eskainiko dutena. Beste 20tan, berriz, eskulangintza lanak. Bertoko produktuak sustatzeko asmoz, barazki eta janari lehiaketa egingo dute, etxeko ogi onena, gazta eta barazki onenak eta salmenta-postu onena sarituz.
Hala ere, aurtengo berrikuntzarik handiena “ Gastronomia Astea” da. Abenduaren 3tik abenduaren 15era terreña arrazako behi okelaz prestatutako menú bereziak eskainiko dituzte Orozkoko lau jatetxek, Arrugaetak, Izak, Batzokiak eta Zubiaur jatetxeak hain zuzen ere. Abeltzaintza zinegotzia den Rakel Olabarriaren hitzetan, jarduera honen helburua terreña okelaren dohainak ezagutzera ematea da.
Bestalde, azokaren harira bi jardunaldi tekniko antolatu dira Orozkoko Museoan bertan. Lehenengoa,ostegunean, hilaren 13an egingo da, 19:00etatik aurrera, eta lehen sektoreko eskualdeko plan estrategikoa izango du ardatza. Biharamunean, abenduaren 14an, eta ordu berean, 19:00etan, jantoki kolektiboez eta elikadura-burujabetzaz jardungo dute.
Azokara hurbiltzen direnek beste pizgarri bat ere topatuko dute: Eusko Labeldun terreña okelako hanburgesen dastaketa, 12:00etan.