«Alderdia birfundatu behar dugu; bipartidismoa ez da itzuliko»

Anduezak egiten duen diagnostikoarekin bat dator, «neurri batean», Elorza. Baina Donostiako alkate ohiarentzat «sakoneko eztabaidari» uko egiten diote Lopezen aldekoek eta Diazenek. «Alderdia birfundatu behar dugu; antzinako errezetek ez dute balio: haiek uste dute bipartidismora itzuliko garela, eta ez da egia». «Espainiako sozialdemokraziaren proiektua dago hemen jokoan», azpimarratu du.

«Pertsonalismoez» hitz egitean, Elorzarentzat ez da zuzena hori Sanchezekin lotzea. «Hau nobleen, baroien alderdi bat da, eta haiek militantziaren iritzia mespretxatzen dute», esan du, Sanchezen dimisioa eragin zuen batzarra gogoan. «Ezin da berriz gertatu: militantzia ahaldundu behar dugu, eta hari itzuli behar diogu alderdiaren kontrola».

Egun Espainian diputatu denarentzat, bi izan behar dira «alderdi sozialista berriaren» ardatzak: ezkerreko politikak eta federalismoa. «Alternatibarik ez dagoela dioen eskuinaren aurrean, Europako testuingurura egokitzen den beste eredu ekonomiko eta fiskal bat aurkeztu behar diegu herritarrei».

Hori aurrera eramateko, alderdiaren «autonomia» ezinbestekoa dela dio Elorzak, baina ez Anduezak azaldu duen eran. Beretzat ez da arazo bat PSOEk akordioak egitea «ezkerrezko beste alderdirekin», «betiere zintzo jokatzen bada eta proiektuak errespetatzen badira, ezer inposatu gabe». Elorzarentzat, gainera, PSOE «eskuinaren menpekoago» izan da azken urteetan. «Gure proiektua ezin da egon botere ekonomiko eta mediatikoen menpe edo PSOEren betiko agintarien menpe».

Federalismoaz, berriz, «filosofia» hori alderdiaren erabakiguneetara eraman behar dela dio. «Boterea partekatu behar da». Era berean, «Espainia ulertzeko» era ere egokitu behar dela dio. «Espainia nazioen nazioa da, baina ez abertzaleek ulertzen duten eran, nazio-estatu gisa; guretzat, nazio kulturalak daude».

PSOE ez ezik PSE ere «ETAren osteko garaira» egokitu behar dela uste du Elorzak.