Estatutu berria errespetatzeko eskatu dio Legebiltzarrak Madrili

Eusko Legebiltzarreko autogobernu lantaldea lantzen ari den estatutu berria parlamentu horretan onartzen den moduan errespetatzeko galdegin dio legebiltzarrak Espainiako Gobernuari. EH Bilduk aurkeztu duen ekinbideak jasotzen duenez, legebiltzarrak onartuko duen estatus politiko berriak «berme demokratiko guztiak» izango ditu, eta, beraz, Espainiako Gobernuari eskatu dio «Arabako, Bizkaiko eta Gipuzkoako herritarren borondate askearen isla» izango den akordioa «demokratikoki» aintzat hartzeko, «bere osotasunean». EAJren aldeko botoekin onartu dute EH Bilduk aurkezturiko testua.

EH Bilduk ohartarazi du Espainian «atzerakada demokratikoa» ari dela gertatzen. Maddalen Iriarte legebiltzarkideak salatu duenez, Euskal Herriko nahiz Kataluniako erakundeen erabakiak indargabetzeko, «beto sistematikoa» erabiltzen, «legedia bihurritzen» eta «justizia maneiatzen» du Espainiak. Egoera horri aurre egiteko modu bakarra Euskal Herriaren subiranotasuna defendatzea da, Iriarteren esanetan. Joseba Egibar EAJko legebiltzarkideak koalizioak aukeztutako proposamenaren izaera «demokratikoa» defendatu du. Gaineratu du Araba, Bizkaia eta Gipuzkoaren, eta Espainiaren arteko harremana ezin dela mendekotasunean oinarritu; «elkarrenganako aitortzan eta errespetuan» baizik.

Elkarrekin Podemosek EH Bilduri leporatu dio Kataluniako eredua Euskal Herrira ekartzen saiatzea. Lander Martinez bozeramailearen esanetan, EAJri «ederki datorkion argazki bat oparitu» dio EH Bilduk, «PPrekin dituen akordioak zuritzeko». Horrez gain, «auzi nazionalari» gizarte arazoei baino garrantzi handiagoa ematea ere egotzi dio. Aldiz, EH Bilduk kritikatu egin du Elkarrekin Podemosek abstentziora jo izana.

PSE-EEko legebiltzarkide Antonio Pastorrek ohartarazi du estatu politiko berriak «segurtasun juridiko osoa» izan behar duela, eta «biktimismoa» saihesteko eskatu die alderdi abertzaleei. Autogobernu lantaldearen eztabaida «lehertzea» leporatu dio, berriz, PPk EH Bilduri. Testua errespetatzeko eskatzea ez da onargarria, Borja Senperren arabera, «astakeria juridiko bat» ezin delako aintzat hartu. «Ziurgabetasun juridikoaren eta politikoaren bidea hartzen baldin badugu, Euskadin gatazka piztuko da, eta hautsi egingo da elkar ulertze giroa».

Torturaren txostena

Torturari buruz Kriminologia Institutuak egindako txostena erretiratzeko eskaria egina zuen PPk, baina Eusko Legebiltzarrak atzera bota zuen atzo.