Barkos: «Nafarrok erabakiko dugu geure estatus politikoa»

EAJk Araba, Bizkai eta Gipuzkoarako estatus politiko berri baterako aurkeztu duen proposamenak zazpi lurraldeko Euskal Herria aipatzen du, eta horrek hautsak harrotu ditu Nafarroan. UPNk Nafarroako Gobernuaren aurka egiteko aprobetxatu du jeltzaleen testua, eta alderdiko buru Javier Esparzak «euskal abertzaletasunaren zerbitzura» egotea leporatu dio Nafarroako presidente Uxue Barkosi. Barkosek erantzun egin dio: «Nafarrok erabakiko dugu geure estatus politikoa». Era horretan adierazi du presidenteak Nafarroaren erabakitzeko eskubideren aldeko jarrera, defendatuz Nafarroa «bere herritarren ahotsari soilik erantzungo dion subjektu politikoa» dela.

Barkosek adierazi du ulertu behar dela EAJren proposamena alderdi politiko baten proposamena dela. Planteamenduarekin ados dagoen galdetuta, ordea, erantzun du hori ez dela kontua, eta azpimarratu du bakoitzak bere «jarrera politikoa» duela. Halere, nabarmendu du berak «oso argi» duela Nafarroan «gehiengoak non dauden une honetan», eta konpromisoa duela gehiengo horiek defendatzeko.

«Kanboko estatutua»

EAJren Euzkadi Buru Batzarreko presidente Andoni Ortuzarrek ere hitz egin du dokumentuaz, eta adierazi du PPk sortutako polemika «artifiziala» dela. Izan ere, Legebiltzarreko PPren bozeramaile Borja Semperrek «Kanboko estatutua» deitu dio jeltzaleek aurkeztutako proposamenari, eta «ETAren bide orria» jarraitzea leporatu dio EAJri.

Ortuzarrek Semperri gogorarazi dio datorren astean Madrilgo gobernuak EAJrekin negoziatu nahiko duela, Espainiako Estatuko aurrekontuak aurrera eramateko. «Zer esango diet? Kanbokoa naizela? Ea nola esertzen diren ETAkoekin?», galdetu du.

Gaineratu du EAJk ez duela «berritasunik» sartu proposamenean, eta azpimarratu hasiera puntua dela, autogobernu lantaldeko negoziazioen ostean alda daitekeena.