Madrilgo hainbat komunikabidek Espainiako Gobernuaren iturriak aipatu dituzte, eta, iragarri dutenez, bihar bilduko dira ministroak, larrialdi egoera ezartzeko, besteak beste Hego Euskal Herriko lehendakariek hala eskatu ondoren.
Deialdi ofiziala egitea falta dela onartu dute galdekaturiko gobernukideek, baina iragarri dute «ziurrenera» igandean egingo dela Ministroen Kontseilu berezia.
Gaineratu dutenez, espero dute erabakia Alderdi Popularraren sostenguarekin hartu ahal izatea, eta harekin gatazkarik sortu gabe. Izan ere, alarma egoera ezartzeak erkidego autonomo guztiei eragingo lieke, eta popularrek horietako batzuk gobernatzen dituzte.
Ministroen Kontseilua asteartean biltzekoa zen, Pedro Sanchez Espainiako gobernuburuak astelehenean erkidegoetako buruekin bilkura egitea aurreikusita baitago. Bilkura horretara gonbidatuta dago Ursula von der Leyen Europako Batzordeko presidentea.
Ministroen Kontseilua aurreratzeko erabakian eragina izan du Iñigo Urkullu Iñigo Eusko Jaurlaritzako eta Maria Txibite Nafarroako Gobernuko lehendakariek alarma egoera ezartzeko Madrili atzo eginiko eskaera formalak.
Albiste hau Berria.eus atarian plazaratu da eta Creative Commons lizentzia baliatuta ekarri dugu hona.