Gaurtik hasi eta martxoaren 20ra arte iraungo du aurtengo Nafar hegoaldeko uzta eskutik eskura kanpainak. Lelo berriarekin dator: Zubi bat sukaldera, baina kanpainaren plantemendua betikoa izango da: oliba-olio birjina estra eta kontserba-sortak eskatu ahal izango dira euskaraz etiketatuta eta, auzolanari esker, ekoizlearen jatorrizko prezioan.
Produktuei buruzko informazioa eta eskaerak
Sukaldean batzen gara. Sukaldean prestatzen dugu janaria; sukaldean egiten ditugu otorduak; sukaldean aritzen gara solasean. Sukaldeko mahaiaren inguruan konpartitzen ditugu kontu txikiak eta ospatzen ditugu egun handiak. Sukaldea da etxeko erdigunea. Sukaldea da familiaren sorlekua. Sukaldea da jendartearen lehen ataria.
#ESKUTIKeskura sukaldearen eremu partikularra gainditzeko proposamena da. Sukaldera zubi bat sartzeko formula bat, eta sukaldetik zubi bat irtetekoa. Norbere sukaldea gainerakoekin lotzeko bidea. Errigoraren inguruan sortu dugun komunitatearekin bat egiteko era.
Zubi bat sukaldera, Errigoraren komunitatearekin bat egiteko
Zubi bat sukaldera, desberdinak izanagatik, gure berdinak diren milaka familia gure mahaira ekartzeko. Zubi bat sukaldetik Lodosako pikillo piper soroak usaintzeko eta Cascanteko olio-errotako langileei eskutik heltzeko. Zubi bat sukaldera, herriz herri auzolanean ari garen boluntarioei baso bat ur eskaintzeko.
Zubi bat sukaldera, zubiaren beste aldekoekin batera amesteko
Zubi bat sukaldera, zubiaren beste aldekoekin batera amesteko. Elikagaiak milaka kilometrora dauzkagun lurretatik ekarri ordez, bertokoaren aldeko apustua egiten duen Euskal Herria amesteko. Gure elikadura beharrei erantzuteko gai den herria amesteko. Merkatuaren logika eroari ihes egin eta ingurumena errespetatzen duen nekazaritza-ekoizpen eta banaketa-eredua amesteko. Nafarroa hegoaldearen berreuskalduntzearekin amesteko.
Zubi bat sukaldera ohitura sanoak sartzeko
Arduraz kontsumitzeko: bertakoa, kalitatezkoa eta osasuntsua. Arduraz ekoizteko: bertako lehengaiekin, langileak errespetatuz eta ingurumena zainduz. Arduraz elkartrukatzeko: auzolanean, euskaraz eta alde bientzako bidezko prezioan.
Zubi bat sukaldera bizipoza ekartzeko
Auzolanari gure atea zabaltzeko eta auzolankideei aulki bana ateratzeko, irribarreak gure ezpainetarainoko bidea egin dezan. Sukaldeko pantailako pixelezkoen ordez, haragizko pertsonekin harremana egiteko.
Zubi bat Nafarroa hegoaldeko produktuak gure sukaldera heltzeko
Oliba-olio birjina estra eta kontserba-sortak, ekologiko zein ez ekologikoak, euskaraz etiketatuta eta ekoizlearen jatorrizko prezioan hel daitezen, gainera. Despentsa urte guztirako betetzeko intentzioz. Keinu txiki batekin komunitate handi eta askotariko baten parte sentitzeko zirraraz.
Osorik irakurri
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide
