Eusko Jaurlaritzak alerta laranja ezarriko du igande honetan, ekainak 21, muturreko tenperatura altuengatik Euskadin, lurralde osoari eragingo dion bero handia espero baita. Alerta 12:00etatik 20:00etara egongo da indarrean; tarte horretan, tenperatura maximoak 35 ºC-ra irits daitezke kostaldean, 39 ºC-ra barnealdean, 37 ºC-ra trantsizio-eremuan eta 37 ºC-ra Ebro ardatzean.
Igandean, halaber, abisu horia egongo da indarrean tenperatura altu iraunkorrengatik, 00:00etatik 24:00etara; izan ere, tenperatura minimoak eta maximoak 20/35 ºC-ren bueltan egon daitezke kostaldean, 19/39 ºC-ren inguruan barnealdean, 18/37 ºC-ren inguruan trantsizio-eremuan eta 20/37 ºC-ren inguruan Ebroren ardatzean.
Gainera, Eusko Jaurlaritzak alerta laranja ezarriko du igandean Araban baso-suteak izateko arriskuagatik, 00:00etatik 24:00etara. Arriskua handia izango da tenperatura altuengatik eta hegoaldeko haizearen intentsitateagatik. Bizkaian eta Gipuzkoan abisu horia egongo da egun osoan baso-suteen arriskuagatik, arrazoi berberengatik.
LARUNBATA
Larunbatean, ekainaren 20an, tenperatura altu iraunkorrengatiko abisu horia indarrean egongo da trantsizio-eremuan eta Ebro ardatzean egun osoan zehar. Tenperatura minimoak eta maximoak 17/33 ºC ingurukoak izan daitezke trantsizio-eremuan, eta 19/34 ºC ingurukoak Ebroren ardatzean. Kostaldean 19/27 ºC ingurukoak izan daitezke, eta barnealdean 18/31 ºC-koak.
Larunbat horretan bertan, 18:00etatik 24:00etara, abisu horia egongo da indarrean prezipitazio handiengatik. Ordubetean 15 l/m² baino gehiago bota ditzake, eta zaparrada ertainak eta trumoitsuak bota ditzake. Baliteke zaparrada handiak botatzea, 2-4 zentimetroko txingorra egitea eta 70 eta 100 km/h arteko haize-bolada oso gogorrak izatea. Araban baso-suteak izateko arriskuagatik ezarritako abisu horia ere indarrean egongo da egun osoan.
GOMENDIOAK
Aire zabaleko berotik babestea:
- Saihestu eguneko erdiko orduetan eguzkitan egotea.
- Ez jarri inoiz zuzenean eguzkitan 6 hilabete baino gutxiagoko haurtxoak.
- Erabili kapela, eguzkitako betaurrekoak eta eguzki-babes egokia.
- Jantzi arropa arina, nasaia eta transpiragarria.
- Saihestu jarduera fisiko bizia egitea, batez ere tenperatura handieneko uneetan.
- Kontsultatu osasun-langileekin sintoma hauek agertzen badira: ahulezia, nekea, zorabioak, goragalea, ikusmen lausoa edo ordubetetik gora irauten duten alditxarrak.
Etxea fresko mantentzea
- Itxita eduki leihoak eta pertsianak bero gehien egiten duen orduetan.
- Gauez etxebizitza aireztatu, gelak freskatzeko.
- Saihestu eguneko erdiko orduetan beroa sortzen duten etxetresna elektrikoak erabiltzea.
- Haizegailuak kontuz erabili, 35 ° C-tik gora ez baitute gorputzeko tenperatura murrizten.
- Freskatu ur hotzeko dutxa edo bainuekin, edo zapi hezeak erabilita aurpegian eta eskuetan.
- Ezin bada etxebizitza fresko mantendu, igaro egunean 2-3 ordu klimatizatutako lekuetan, esaterako, eraikin publikoetan.
Deshidratazioa saihestea
- Edan maiz ura eta likidoak, egarri izan arte itxaron gabe.
- Saihestu kafeina, alkohola edo azukre asko duten edariak, deshidratazioa errazten baitute.
- Handitu fruta, barazki eta entsaladen kontsumoa gatz mineralak berritzeko.
- Saihestu berora egokitzea zailtzen duten otordu oparoak, koipetsuak edo astunak.
Pertsona zaurgarrienak zaintzea
- Arreta berezia eman haurtxoei, adingabeei, haurdun edo edoskitzaroan dauden emakumeei, adinekoei eta gaixotasunak dituztenei.
- Ez utzi inoiz inor ibilgailu itxi batean, ezta itzalean ere.
- Zaindu bereziki bakarrik bizi diren edo mendekotasuna duten adinekoak, haiek egunean behin gutxienez bisitatuta.
- Larrialdietan, 112 zenbakira deitu behar da.