Green Cup World Series eta Challenge Nacional-aren barruan egiten den Urduñako Ultimate duatloiaren VII. edizioa egin zen atzo goizean. Proban, oinez egin beharreko tartea 8km-koa izan zen, eta bizikletazkoa 16 km-koa. Parte-hartzea banakako zein bikotekako modalitateetan egin zitekeen.
Hirian egiten den kirol proba gogorrenetakoa den honetan 75 kirolarik hartu zuten parte. Sailkapenean, BH Bike Zona taldeko Juan Carlos Nieva izan zen lehenengoa, 1:40:13.772 denbora eginez. Bigarren postuan, Tragaleguas taldeko Rodrigo Alonso geratu zen 1:42:28.294 denborarekin, eta hirugarrenean Luis Mari Urizar, Trigoi taldeko kidea, 1:44:06.564 denborarekin.
Azkenean, larunbat goizean egiteko antolaturik zeuden oinezko eta mendi-txirrindulako mendi igoeren lehiaketak bertan behera geratu ziren. Erabaki hau, larunbatean lasterketetan parte hartzeko kirolari gutxi prest zegoelako hartu behar izan zuten, Green Cup-aren antolatzaileek jakinarazi digutenez; izan ere, atletek neke handia pilatzen dute larunbatetik igandera bi egunetan lehiatu nahi baldin badute.