SOS Laudioko Lamuza Parkea plataformak atzo baliatu zuen Musika Etxearen irekiera salatzeko Kasinoko lanek ezinezkoa egingo dutela herritarrek terraza erabiltzea.
Plataformak testua eman zien Arabako Foru Aldundiko ordezkariei eta bertan nabarmendu du Jose Luis Catón arkitektoak aurreikusitako proiektuak ezinezkoa egingo duela laudioarrek terrazaz disfrutatzea.
Izan ere, teknikariak prestatu du zaharberritze zientifikoa eta horrek egiturak dauden moduan mantenduko ditu. Ondorioz, jendea ezingo da terrazara igo.
Argudio teknikorik ez
SOS Laudioko Lamuza Parkea plataformak adierazi du urtebetez ekarpenak egin dituela hori ekiditeko eta ez duela ulertzen inbertsio handia egitea eraikinaren erdia konpontzeko.
Plataformaren ustez, ez dago argudiorik zaharberritze zientifikoa gauzatzeko, berez, Kasinoak daukan babes mailak -B kategoria, alegia- ez baitu horretara behartzen.
Ondorioz, SOS Laudioko Lamuza Parkearen aburuz, egitura sendotu edota igogailua jartzeko oztopo legalik ez dago.
Eraikin erdia, 270 metro koadro
Plataformako kideek uste dute zentzudunagoa dela orain Kasinoa konpontzea guztiz, obra zibil handia egikarituko baita. Euren iritziz, gero egitea askoz garestiagoa izango da.
Guztira, 270 metro koadrok osatzen dute terraza eta plataformaren apustua da leku hori baliatzea jarduera kulturalak antolatzeko.
"Arkitektoaren kapritxoa"
SOS Laudioko Lamuza Parkeak Jose Luis Catonen "kapritxotzat" jo du proiektua eta azpimarratu du ez duela ulertzen zergatik teknikari bakarraren iritziak laudioarren kaltea ekarriko duen.
