Atzo egin zen Laudioko kultur mapa osatzeko prozesuaren azken bilera. Dozenaka herritarrek hartu zuten parte, norbanako gisa edota kultur talderen bateko ordezkari moduan.
Conexiones Improbableseko kideek (prozesu osoa bideratzeko udalak kontratatutako plataforma) hartu zuten hitza lehenbizi. Ondorioak plazaratu zituzten, kultur mapa osatzeko eginiko bilera eta kedadetatik ateratakoak.
Hiru lan-talde
Hiru lan-talde osatu ziren gero. “Antzoki-zinema” izan zuen hizpide lehen taldeak, “Lamuza Parkea” bigarrenak eta “Laudioko kultur mahaia” hirugarrenak. Ordubetez eztabaidatzen eta ideiak plazaratzen egon ostean berriz batu ziren hiru taldeak, ateratako ideiak komunean jarri eta ekarpenak jasotzeko.
Txosten bat osatuko dute Conexiones Improbableseko kideek, eginiko bilera guztietan ateratako ideiekin. Udalaren esku geratuko da dokumentu hori, eta berari egokituko zaio bertan azaltzen diren ideia eta ondorioekin zer egin zehaztea. Modu horretan emango zaio amaiera iragan urrian hasitako prozesuari.