Gaur izan da Iñaki Montesen aurkako epaiketa Bilboko Epaitegian. Beste hiru pertsonekin batera epaitu dute. JEZeko langilea pozik azaldu da epaiketarekin, tartea izan duelako epailearen aurrean nahi zituen azalpen guztiak emateko. Atxilotu zutenean ertzainen partez jaso zituen jipoiak salatu ditu baita Montesek, eta azpimarratu du ospitalera eraman behar izan zutela kolpe horien ondorioz.
Ertzainen arteko kontraesanak
Bestetik, Montesek adierazi du ertzainak euren lekukotza ematera mugatu direla, beste inolako frogarik aurkeztu gabe, eta gaineratu du kontraesanak eman direla ertzainen arteko deklarazioetan. Inputatuetako batek adierazi du bera ez zegoela Bilbon egozten zaizkion delituak jazo zirenean. Hori guzti hori dela eta, poliziak "lekukotza faltsuak emateagatik" ikertzeko eskatu du defentsak.
2014ko martxoaren 3an atxilotu zuten Iñaki Montes beste hainbat lagunekin batera, FMIk Bilbo bisitatu zuenean gertatutako protesten testuinguruan. 5 urteko kartzela zigorra eskatzen diote, 200.000 euro baino gehiagoko kalte-ordainekin batera.