Laudioko Udalak jakinarazi du analitikak egingo dituela udalaren eraikinetan dauden ikastetxeetan, amiantoa dagoen edo ez jakiteko. Udal eraikin guztietan egingo dituzte azterketa horiek, baina ikastetxeetatik hasiko dira. Amets Meazak adierazi du hitz egin dutela dagoeneko mota horretako analitikak egiten dituen enpresa batekin. “Hitzordu bat jartzea baino ez da falta”, adierazi du zinegotziak, “baina emaitzak jakiteko 2-3 hilabete beharko dira, denbora hori beharko dutelako hartzen dituzten laginak aztertzeko”.
2-3 hilabete beharko ditu enpresak laginak aztertzeko
Analitika horien helburua da ikastetxeetan minbizia eragiten duen material hori dagoen edo ez ziurtatzea. Analitikak positibo emango balu, neurriak hartuko lituzke udalak, “zutabeak estaliaz edo dagoen amiantoa kenduaz”. Hala ere, Meazak azaldu du ezingo dutela amianto guztia aurten kendu, “arrazoi ekonomikoengatik”. Hori dela eta, zinegotziak adierazi du Eusko Jaurlaritzarekin hitz egingo dutela, ekonomikoki lagundu dezakeen ikusteko.
Latiorroko fibrozementua eta Aretako uralita
Bi dira momentuz amiantoa kentzeko egingo dituzten obrak. Fibrozementuzko plaka batzuk kenduko dituzte Latiorroko Ikastetxetik. Aretako Fabian Legorburu ikastetxean, aldiz, uralita bat kentzeko lanak egingo dituzte. Udan egingo dituzte bi obra horiek. Amiantoz eginiko materialak dira uralita eta fibrozementua.
Obrak ikastetxeetan
Eusko Jaurlaritzak ematen duen diru-laguntza bat baliatuko du udalak Latiorroko fibrozementuzko plakak kentzeko. 27.000 euro baliatuko dituzte obra hori egiteko, Meazak adierazi duenez.
Beste bost obra egiteko finantziazioa eskatuko dute diru-laguntza hori baliatuta. Horietako bi Fabian Legorburu ikastetxean egingo dituzte. Haur Hezkuntzako eraikineko leihoak aldatuko dituzte (29.400 euroko aurrekontuarekin) eta jolastokiak zolatuko dituzte baita (20.360 euro).
152.580 euro baliatuko dituzte sei obra egiteko udal eraikinetan dauden lau ikastetxeetan
Lamuza Ikastetxean ere bi lan egitea da asmoa: suteen aurkako azpiegiturak jartzeko (19.620 euro) eta arkupeari zoladura jartzeko (17.500 euro). Helduentzako Ikastetxean, aldiz, eraikinera sartzeko dagoen kasetoia berrituko dute (38.850 euro). Obra guztiak batuta, 152.580 euro inbertituko dituzte.
Diru-laguntza tramitatu berri du udalak, eta Eusko Jaurlaritzaren erantzunaren zain dago. Hala ere, Amets Meazak azaldu du azken urteetan eskatutako diru-laguntza eman izan duela jaurlaritzak. Laguntza jasotzekotan, jaurlaritzak obra guztien % 60a finantzatuko luke, eta udalak jarri beharko luke gainontzekoa.
Amets Meazak azaldu du bi irizpide erabili dituztela zein obra egin erabakitzeko: ikasle kontseiluetatik eginiko eskaerak eta legedia berrietara egokitzeko egin beharreko obrak.