Gregorio Marañon ikastetxearen aldameneko lurra erori zen errepidera atzo, Laudioko Ugarte auzoan. Lau ibilgailu txikitu zituen erorketak, eta emakume batek peronea apurtu zuen ezbeharraren ondorioz. 9:00ak aldean jaso zuten udalean gertaeraren berri, Amets Meatza zinegotziak azaldu duenez: "Udaltzainak, brigadako langileak, teknikariak eta lurra kentzeaz arduratuko den enpresa egon ziren atzo". Egoeraren eta konponketa lanen informazio zehatza emateko asanblada egingo dute kaltetutako bizilagunekin urtarrilaren 3an, 10:30ean udaletxean.
"Espero dugu herritarra arin errekuperatzea eta kalte materialetan soilik geratzea kontua", adierazi du Meatzak. Aseguru etxeekin tramitazioak egiteari ekin diote dagoeneko.
"Lehentasuna eremua babestea da orain, horregatik moztu dugu trafikoa eta oinezkoentzako bidea. Bizilagunek lorategien aldamenetik ateratzeko aukera izango dute". Segurtasun baldintzak eduki arte egongo da itxita, hots, lur guztia kendu eta arriskua bukatu arte.
Aurrekariak
Duela hiru hilabete egin zuten azterketa teknikoa eremu horretan. "Emaitzek ez zuten larritasunik edota arriskurik bistaratu. Edozelan ere, udaletik hormak hobetzeko aukerak aztertzeari ekin genion", aipatu du kezkatuta.
Gregorio Marañon hezkuntza zentroari ere eragiten dionez, Eusko Jaurlaritzarekin jarri dira harremanetan, lur jausiaren goiko partean baitago zentroko jolastokia. "Ikastetxera iristeko modua dago, baina etxebizitzetara heltzeko autoa inguruan aparkatu behar da, oinez bertaratzeko".
Arrazoiak eta erantzukizuna
Istripuaren arrazoiez galdetuta, eraikitzeaz arduratu zen promotorearen akatsa nabarmendu du Meatzak:"Duela hiru hamarkada eraiki zen horma, baina ez baldintza onenetan. Lau metroko pareta izan behar zen eta zortzikoa egin zuten". Alabaina, asteotako euriteen ondorio ere izan litekeela aipatu du zinegotziak. "Bizilagunek burdin gutxi zuela paretak esan ziguten, baina promotoreak egin zuenez, guk ezin izan dugu ezer egin".
Egun, ordea, ardurak aldatu dira. Izan ere, urbanizazioaren mantenua udalaren gain geratu da; garbiketa, besteak beste. "Guk ez genuen exekutatu baina udalari dagokio gaur egun obrari aurre egitea", azpimarratu du.