Laudioko Udalak eraso matxisten aurkako protokoloa osatuko du. Amets Meatza zinegotziak azaldu duenez, Berdintasun Arlotik bideratuko da egitasmoa: "2018ko sanroke jaietan abian egotea nahi dugu".
Zentzu horretan, eragileei luzatuko dietela prozesuan parte hartzeko deia aurreratu du; elkarteekin, tabernariekin, emakume taldeekin, Jai Koadrilekin eta Txosna Batzordearekin nahi baitute, besteak beste, zehaztea prozedura.
Ez da, ordea, tokiko instituzioaren baliabide bakarra: "Udalak badu barne mailako protokoloa, duela bi urte sortu genuen beste administrazio batzuekin elkarlanean". Hirugarren Berdintasun Planaren baitan kokatu dute proiektua: "Orain herri-erantzuna adostu behar dugu. Helburua tokiko edozein festetan aplikatzea da".
Kanpaina
Jai eremuetan nahi dute eragin, batez ere. Hori dela eta "Ez beti da ezetz" kanpaina gauzatu dute eguberrietan: "Herriko jaietatik harago, bestelako festa egunetan ere zabaldu nahi dugu aldarria". Horien artean zerrendatu dituzte inauteriak edota Gabonak, "gozatzeko garaiak dira, baina errespetutik".
Sentsibilizaziorako ekimen gisa, kartelak itsatsi ditu kaleetan eta tabernetan udalak: "Hirugarren berdintasun planaren barruan konpromisoa hartu genuen sentsibilizazio kanpainak gauzatzeko; baina ez une puntualetan bakarrik, zoritxarrez eraso matxistak urteko 365 egunetan gertatzen dira". Meatzaren esanetan, berrikuntza gisa, bi aldeetatik diseinatu dituzte euskarriak. Era horretan, kristalezko ateak dituzten tabernetan barrutik eta kanpotik egongo da ikusgai mezua.
Laudioko jaietan eraso sexisten aurkako bideoa plazaratu zuen udalak: