Ostiralero egiten duen prentsaurrekoan erantzun dio udal gobernu taldeak EAJko oharrari, kazetariek galdetuta. EH Bilduko alkateordea den Jon Ander Altubek azaldu du ez diotela trabarik jarri Mercadona enpresari eta ohiko prozedura jarraitzen ari direla.
Hori bai, koalizioaren ordezkariak argitu du merkatalgune handien eredua ez dela eurena eta, ondorioz, ez diotela tratamendu berezirik eman Mercadonaren egitasmoari.
HAPOren aldaketa
Hiri Antolamendurako Plan Orokorra aldatu behar dute Mercadonak baimena izan dezan supermerkatua irekitzeko Tubacex enpresako lantegiaren eta suhiltzaileen eraikinaren artean. Hau da, orain zoru industriala dena, merkataritzarako zorua bilakatu behar da.
Horretarako, udal gobernuak osatutako proposamena bozkatu beharko dute udalbatzan.
Jon Ander Altubek gaineratu du atzerapena datorrela gainerako alderdiek ez dietelako eman iritzirik proposamena osatzeko: "Azken batzordea astelehenean izan zen eta oposizioak ez zuen ezer adierazi".
Gauzak horrela, espedientea bukatu dute, eta proposamena zehaztu bezain laster, udal osoko bilkuran bozkatuko da. EH Bilduk iragarri du ez duela alde egingo, baina gehiengoak erabakitakoa onartuko duela.
Merkatari txikiak eta enplegu kalitatea
Aldiz, EH Bilduk aldarrikatu du bestelako herri eredua, merkatalgune handietan oinarrituta ez dagoena, baizik eta merkatari txikietan: "Mercadona heltzen bada, lanpostuak sortuko ditu, baina kontua da zenbat denda txiki itxiko diren eta zer nolako enplegua ekarriko duen".
Horrez gain, Jon Ander Altubek azpimarratu du merkatari txikiek herrigunea pizten dutela eta herriko bizitza ehuntzen dutela, kanpoko aldean dauden supermerkatuek ez bezala.
