Esti Urresolak zuzendu du Ipar Euskal Herriko Kalakan perkusio taldearen bideoklip berria. “Taldeko kideak jarri ziren nirekin harremanetan”, azaldu du zinemagile laudioarrak, “nire lanak gustuko zituztela esan zidaten eta euren azken diskoa -Elementuak izenekoa- pasa zidaten, esan nezan bertako zein abestiren bideoklipa egin nahiko nukeen”.
Diskoko hamalau abestiak entzun eta Hombarerimbon kanta aukeratu zuen Urresolak, hainbat arrazoiengatik. “Misterioa iradokitzen zidan eta hizkuntzari dagokionez erreferentzialtasuna galtzen zuen. Bazuen mantra puntu bat ere, oso iradokitzailea”.
Bideoaren identitatea osatzen
Horrela hasi zen lanaren estetika zehazten. “Oso argi izan nuen hasieratik zuri beltzean eta kamara geldoa baliatuta egingo nuela, atenporalitatean kokatu ahal izateko”. Hainbat elkarrizketa egin zituen taldeko kideekin, “euren izaeraren berri izateko”. Hortik atera zituen grabaketa egiteko “funtsezko ideiak”. “Ikusi nuen eurentzat jatorriak, lurrak eta Euskal Herriarekiko atxikimenduak garrantzi handia zutela”. Horregatik erabaki zuen bideoa Sara inguruan grabatzea, “taldekideen identitatearekiko koherentzia mantentzeko”. Ipar Euskal Herrian barrena bidaiatu zuen taldekideekin, eta bisitatu zituzten toki guztietatik aukeraketa bat egin zuten.
Eskuak dira bideoaren protagonista nagusiak. “Taldekideetako baten aitak 'eskuahaldun' hitza erabiltzen du euskaldun ordez. Asko gustatu zitzaidan hitz-elkarketa hori: 'esku' eta 'ahaldun'en artekoa, euskaldunak edozertarako gai garela adierazteko balio du”.
Euskal Herriko jakituriaren transmisioa irudikatu nahi izan du Urresolak modu horretan. Elementu asko agertzen dira bideoan: zuhaitzak, sua... “Esanahien kate bat” osatzen da elementu horiek lotuaz, Urresolak azaldu duenez. “Bideoko protagonista den neskak egurraren marrei begira ezagutza jasotzen du, eta ikusten du bere eskuetan ere marra horiek dituela”.
Zeresan handia eman duen taldea da Kalakan, Madonna abeslari estatu batuarrarekin hainbat kontzertu eskaini dituelako bati-bat:
