Popularrek adierazi dute mozioa irekirik dagoela eta alderdiek aukera daukatela hobetzeko edota nabardurak txertatzeko. Aipatutako aldarrikapen hori ez ezik, nahi dute Arabako Batzar Nagusiek Eusko Jaurlaritzari eskaera egitea, honek ahalik eta lasterren eskuratu ditzan lursailak Markixana eta Basaurbeko araztegiak eraikitzeko. Ziurrenik, apirilean eztabaidatuko da testua.
Laguntza teknikoa
Ana Moralesek aurkeztu duen mozioaren xedea da Laudioko Udalak ez sumatzea injerentzia moduan ekimena. Horregatik, aipatu du Arabako Foru Aldundiak lagundu dezakeela esparru teknikoan, bitarteko gehiago baititu isurketen arazoa aztertu eta konpontzeko.
Markixana eta Basaurbeko araztegiak
PP alderdiko ordezkariaren aburuz, Espainiako Gobernuak aldeko ingurumen-inpaktu adierazpena eman ostean, araztegiak eraikitzeko oztoporik handiena gainditu da, behin betiko finkatu baita azpiegituren kokapena.
Ana Moralesek nabarmendu du Espainiako Gobernuak eta URA Agentziak prest dutela diru-inbertsioa egiteko, baina desjabetzeak ez direla guztiz gauzatu. Antza, jabe batekin oraindik ez da lortu akordiorik eta hori omen da arazorik handienetakoa, PPko ordezkariaren iritziz.
Adostasun zabala
Bestalde, talde popularraren bozeramaileak azpimarratu du Espainiako Ingurumen Ministerioak ahalegina egin duela adostasun ahalik eta handiena lortzeko eta kalte ekologikoak saihesteko.
Zentzu horretan, alegazio ugari onartu dituzte: Arabako Foru Aldundiaren guztiak, Laudio eta Amurrioko Udalen asko, baita Eusko Jaurlaritzaren, Ur Partzuergoaren eta jabeen zuzenketa pilo.
