Murtzian egon da asteburuan Ibone Sanchez, "Diablillos de Rivas" taldearekin batera. Bertan, Aguilas herrian, Espainiako Errelebokako Triatloi Txapelketa ospatu zen maiatzaren 6an.
Zailtasun ugari izan zituzten lasterketan zehar Sanchezek eta bere taldekideek. Hasierako kilometroetan taldekide batek harri bat zapaldu eta oina minduta osatu behar izan zuen lasterketa guztia. Ez zitzaizkien, ordea, ezbeharrak bertan bukatu; "aurreikusitakoaren aurka, taldekide bat atzean geratu zen igeriketan geundela, eta, bizikleta hartzerakoan, aldaketa nahiko eskasa izan zen, taldekide batek zapatila bat galdu baitzuen", azaldu du Sanchezek. Txirrindulako kilometroak are gehiago konplikatu zitzaizkion triatleta laudioarraren taldeari, Sanchezek berak erorketa bat izan baitzuen beste talde bat aurreratzen ari zirela. Helmugarainoko bidea xamurragoa izan zitzaien, "nahiz eta oina minduta zuen neskak korrika errenka egin zuen."
Azkenean, podiumeko hirugarren postura igotzea lortu zuten "Diablillos de Rivas" taldeko kideek. "Horren lasterketa konplikatu baten ostean ez genuen emaitza hori lortzerik espero" adierazi du Sanchezek. "Gorabehera guztien gainetik", pozik azaldu da.
