“Kulturkon” aurkeztu berri du Laudioko Kultura Asanbladak, Laudioko kultura ereduaz hausnartu eta proiektuak sendotzeko antolatuko duten Laudioko I. Kultur Kongresua. 2019ko urtarrilean abiatuko da hausnarketarako tartea, baina urritik aurrera kongresuaren barruko ekintza kultural ugari abiatuko dituzte. Elkarrizketaz, lan-mahaiaz, ekintza kulturalez, ibilaldiz eta hitzaldiz osatutako kongresua izango da.
Antolatzaileen hitzetan, “aukeraz betetako” unean aurkitzen da Laudio, kultur ereduaz hausnartu eta proiektu integrala aurrera ateratzeko. Arabako Foru Aldundiak Lamuza Parkeko erakinak berreskuratzeko ekingo dion proiektuak edota udalak kultura-ekipamenduak birgaiztu eta eraikitzeko dituen proposamenak orube emankorra eskainiko dute.
Besteak beste, hainbat baliabide eta azpiegitura berreskuratu nahi dituzte, izan paisajistikoki, arkitektonikoki edo ikuspegi gizatiarretik. Parkea dute antolatzaileek horretarako ardatz. Izan ere, Lamuza Parkea Laudioko kulturaren motor izatea nahi dute.
Hausnarketa prozesu horretan aurrekari ugari izan dira Laudion: 2010eko Lamuzako birgaitze plan berezia, 2014ko une kulturalaren diagnostikoa edota 2016ko kultur mapa, besteak beste. Eragile eta norbanakoen lana ere azpimarragarria izan da, SOS Lamuza Parkea kasu.
Horregatik, antolatzaileek herriko kolektibo, eragile sozial, norbanako, merkatari eta abarren inplikazioa bilatuko dute I. kongresu horretan. Ortuzainaren Etxea eta Kasinoa izango dira hausnarketen epizentroa.
Kulturkon: kultur sorkuntzarako plaza
Hausnarketaz harago, kulturaren plaza ere izango da “Kulturkon”. Urrian ekingo diote eskaintza kulturalari. Eskaintza bi programa nagusitan banatuko dute: “Bienbitartean” eta “Gonbidatuak”. Lehenengo programa herriko taldeen proiektu berritzaileen erakusleiho izango da eta bigarrenak kanpoko sortzaileak ekarriko ditu Laudiora beraien proiektuak partekatzera.
