Gaur jakinarazi dituzte Laudioko Jaietako kartel lehiaketaren irabazleak. Nagusien kategorian Aritz Fernandez de Agirre Gomez gailendu da eta Ekain Aretxaga Martin, aldiz, umeen kategorian. Biak dira Laudiokoak. Fernandez de Agirrek 30 urte ditu eta Baldarrak jai koadrilako kidea da. Aretxagak, aldiz, 12 urte ditu eta Latiorro Ikastetxean ikasten du.
Gauzak hala, Fernandez de Agirrek eginiko irudia baliatuko da aurtengo sanrokeen kartel ofizial gisa. Aurtengoa ez da diseinatzaile laudioarraren estreinako aldia, 2012an ere berak eginiko diseinu bat hautatu baitzuten kartel gisa baliatzeko. Baldarrak koadrilako kideak azaldu du ez duela gogoko lehiaketetara aurkeztea. “Laudiokora aurkezten naiz soilik, denbora dudanean”, adierazi du.
"Guztion jaiak"
Guztion jaia da kartelaren izenburua. Fernandez de Agirrek nabarmendu du oso kartel inklusiboa egiten saiatu dela, jaietako ahalik eta elementu gehien sartuaz. “Ez da ez lemaren puntu morea eta LGTBIQ mugimenduaren ortzadarra sartu ditut, besteak beste”.
Herritarren botoen bidez ebatzi da lehiaketa. Gauzak hala, Laudiokoa dela nabarmentzen saiatu da Fernandez de Agirre bere kartelean, “kanpoko diseinatzaile batek agian ezagutzen ez dituen detaileak sartuta”.
Aretxagak, bere aldetik, adierazi du hainbat aldiz aurkeztu dela lehiaketara, baina hau dela irabazten duen lehenego aldia. “Eskuz egin dut irudia eta jaietako elementurik tipikoenak sartu ditut”, azaldu du 12 urteko gazteak.
51 lan aurkeztu dira guztira lehiaketara. Horietatik 22 pasa ziren bozketa herrikoiaren fasera.