aiaraldea.eus

Zabor eta estolderia tasen kobrantzak kritika berriak sortu ditu oposizioaren aldetik

Erabiltzailearen aurpegia Aitor Aspuru Saez   Politika  Laudio

Laudioko EAJk, PSE-EEk eta Omniak prentsa oharrak zabaldu dituzte salatzeko udal gobernu taldearen kudeaketa zabor eta estolderia tasei dagokienez.

Zabor eta estolderia tasen kobrantzak kritika berriak sortu ditu oposizioaren aldetik
Zaborren bilketa zerbitzuaren kobrantzak daude polemikaren erdigunean. / Aiaraldea.eus | Ikusi handiago | Argazki originala

EAJk, PSE-EEk eta Omniak, Laudioko udaleko oposizioko talde nagusiek, oharrak bidali dituzte hedabideetara zabor tasen kobrantzen harira.

Hiru alderdiek argudiatu dute EH Bilduk atzeratu dituela zerga horien kobratzak hiru urtez. Gainera, biek gogoratu dute 2020an zergak igo behar dituela tokiko erakundeak. Izan ere, araudi europarra jarraiki, udal zerbitzuek ezin izango dute galerarik sortu.

Gauzak horrela, EAJk eta Omniak leporatu diote EH Bilduri kudeaketa kaskarra egitea eta milioi euroko diru sarrerak ez jasotzea.

EAJren proposamena
Jeltzaleek aipatu dute egungo zergak zabor kudeaketaren gastuaren %65 ordaintzen duela soilik. Ondorioz, 2020an %35eko igoera egin beharko da. Hori bat-batean gerta ez dadin, EAJk proposatu du aurten eta hurrengo urtean %12an igotzea zerga, 2020an zerbitzua askitasunera heltzeko.

Egun 75,72 euro ordaintzen dute herritarrek eta 2020an 116,49 eurokoa izango da faktura, EAJren kalkuluen arabera.

Omniaren iradokizuna
Omniak, aldiz, eskatu du zabor eta estolderiaren zergen ordainketa zatika egitea, Ondasun Higiezinen gaineko Zergaren -OHZ- kasuan egiten den moduan. Horrekin asmoa da laudioarren ekonomian ahalik eta eragin gutxien izatea. Talde independenteak adierazi du EH Bilduk ez duela aintzat hartu bere ideia eta inposizioa besterik ez duela erabiltzen.

PSE-EEren oharra
Alderdi sozialistak ere gaiari lotutako oharra plazaratu du. Akordioa lortzeko borondatea badu ere, gogor kritikatu du EH Bilduren kudeaketa. Juan Jesus Merchan Laudioko idazkari nagusiaren aburuz, udal taldeak ez du egonkortasun ekonomikorako araua bete eta 4 milioi euro kobratu gabe ditu.

Horren aurrean, lidergoa eskatu dio EH Bilduri likidezia arazoak ekiditeko.

EH Bilduren erantzuna
Jon Ander Altube alkateordeak polemika hauteskunde kanpainaren testuinguruan kokatu du: "zerga kanpaina hauteskunde kanpaina bilakatu nahi dute".

Oposizioari gezurretan aritzea leporatu dio Altubek eta gaineratu du udalak ez duela "zentimo bat ere" kobratu gabe utzi. Zentzu horretan, EAJ zein Omniari egotzi die alarma egoera zabaltzea udal aurrekontuen inguruan. EH Bilduko kidearen ustetan, udalaren egoera ekonomikoa oso ona da.

Horren guztiaren atzean udaleko finantza eta ekonomia plana dago. Duela gutxi EH Bilduk berea aurkeztu du eta Jon Ander Altuberen iritziz, oposizioaren asmoa da bere onarpena atzeratzea, "inbertsioen kasuan gertatu den moduan".

Gaurko batzordea
Gaur -uztailak 13- egin dute gaia lantzeko batzordea. Omniak oharra plazaratu du adierazteko bilera horrek ez duela ezertarako balio izan, "EH Bilduk bere iritzia plazaratu nahi izan duelako".
"Lehen unetik adierazi digute zein den plenora eramango duten proposamena, eta adierazi dute ez dutela aldatzeko asmorik". Era berean, gainontzeko talde politikoen proposamenak landu ez direla salatu du alderdi laudioarrak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa