Nondik dator Silvio eta Rodriguez proiektua? Nola sortu zen eta zer nolako bilakaera izan du orain arte?
Soraluzeko Gaztetxean urtero egiten da bertsio gaua ihauteritan, norberaren gustuko talde edo bakarlariak imitatzeko aukera izaten da, eta geuk pasa dan urtean Silvio Rodriguezen abesti batzuk egin genituen. Handik gutxira baten batek jakin izan zuen hori egin genuela eta Gazte Akelarrean “La jodedera” taldearekin batera gau kubatarrean parte hartzea proposatu ziguten. Bertsio gauean 4 abesti bakarrik egin genituen… baina hala ere baietz esan genuen eta lana eduki genuen abesti sorta osoa eskaintzeko, baina oso ondo irten zen. Gerora deitzen hasi zian leku batetik eta bestetik eta gu gustura gaudenez jotzen jarraitzen dugu.
Harrera ona izan du proiektuak, beraz.
Guk hasieratik dudak genituen ia ze harrera edukiko genuen, baina harritu gaitu beti oso harrera ona eduki dugula. 15 kontzertu inguru eskaini dugu orain arte eta publikoa beti egon da adi eta entregatuta. Ikusten da jendea gustura egoten dagoela eta geu be horrela egoten gara.
Jende heldua edo gaztea, zein da zuen ohiko publikoa?
Danetik eduki izan dugu, 3 urtetik 70-80 urtera. Jende nagusiak normalean ezagutzen dituzte abestiak. Gazteen artean danetik dago, batzuk Silvio zaleak dira eta beste batzuk ez dute ezagutzen, baina hala ere aitortu izan digute ezagutu ez arren asko disfrutatu izan dutea.
“Hemendik aurrera 'Silvio ta Rodriguez' beharrian 'Ainubeko troba' deituko gara. Honek ez du esan nahi Silvion abestiak egiteari lagako diogunik, baina beste batzuk be tartekatuko dugu”
Silvio Rodriguezen bertsioak egiten dituzue. Zer nolako bertsioak dira? Ukitu edo bereizgarri berezirik dute?
Silvion abestietan saiatzen gara nahiko fidelak izaten, gure ahalaren neurrian, zeren abesti batzuk oso konplikatuak eta aldrebestuak dira. Baina gero eta gehiago sartzen ditugu beste abeslari batzuen kantak, eta hauei bai ematen diegu gure tokia. Hau dala eta izen aldaketa egitea pentsatu dugu.
Hemendik aurrera “Silvio ta Rodriguez “ beharrian “Ainubeko troba” deituko gara. Honek ez du esan nahi Silvion abestiak jotzeari lagako diogunik, baina beste batzuenak ere tartekatuko ditugu, besteak beste, Chavela Vargas, Violeta Parra, Xabier Lete, Mikel Laboa... eta gustuko ditugun beste asko.
Laudioko txosnagunean joko duzue. Zer topatuko du bertan eskainiko duzuen kontzertura gerturatzen denak?
Normalean zuzeneko baten jotzen ez diren abesti eder eta ezagun batzuk entzuteko aukera izango du. Eta gerturatzeko aukerarik ez duenari, gero ordu txikitan parrandan baliteke oraindik abestitxo batzuk entzuteko aukera izatea!