Juan Angel Lekanda tokiko ekoizle laudioarraren elkarrizketa ez grabatzearen arrazoien inguruan mintzatu da EiTBko zuzendari nagusia den Maite Iturbe Gasteizko parlamentuan.
Ekainaren erdialdean ETBk kontratatutako ekoiztetxe bat Laudiora joan zen Lekandari elkarrizketa egiteko, gastronomia saio baterako. “Altsasukoak aske” zioen kamiseta zeraman tokiko ekoizleak, eta grabaketaren arduradunek esan zioten kamiseta hori aldatu beharko lukeela grabaketa egiteko.
Laudioarrak kenduko ez zuela erantzun zien, eta bertan behera utzi zuten grabaketa, “zuzendaritzako kide batzuekin kontsultatu eta gero”.
Maite Iturberen azalpenak
Eusko Legebiltzarrean eginiko saioan, Iturbek uko egin dio kamiseta zentsuratzearen erabakia nork hartu zuen esateari, eta ez du erantzun ezta ea horrelako beste kasurik egon den.
Zuzendari nagusiaren aburuz, EiTBren estilo liburuari jarraiki hartu zen erabakia. Hala dio estilo liburu horrek: “ikusleek, entzuleek eta erabiltzaileek ez lituzkete horrelako mekanismoak erabili behar helburu pertsonal, komertzial edo publizitarioentzat”.
Badirudi Laudioko kasua ez dela izan bakarra. Duela hiru hilabete antzeko gertaera jazo zen Kuartangon. TVEko Aquí la Tierra programak uko egin zion bertako abeltzain bat elkarrizketatzeari, kamiseta bera zeramalako.
