Laudioko Kultura Asanbladan burubelarri murgildua dago SOS Lamuza Parkea: "Parkearen etorkizuna kulturaren ikuspegi globalean integratu behar da". Instituzioek gauzatu nahi dituzten proiektuak aukera egokitzat jo dituzte, nahiz eta arriskuak dituztela azpimarratu. Hori dela eta, "Kulturkon" Kultura kongresura bideratuko dituzte euren indarrak: "Kongresuaren helburua Laudioko kulturaren etorkizunerako garrantzitsuak izango diren ondorioak ateratzea da, eta ondorioz, baita Lamzua parkearentzat ere". Martxorako espero dute bukatzea prozesua.
Prentsa oharrean azaldu dutenez, udal kultur kontseilua birsortzeko esperoan daude, uztaileko udalbatzan ahobetez onartu baitzen. "Uste dugu gogoeta, eztabaida eta erabakiak hartu beharreko fase berri batean gaudela". Haatik, Parke Eguna momentuz alboratzea erabaki dute, eta euren lana Kultura Kongresura bideratzea. Urriaren 16an izango da Udal Kultura Kontseiluko bilera, 19:00etan: "Kontseiluan landuko den guztiaren berri emateko aukera izango dugu".
Parke Egunik ez
"Parke eguna antolatzeak denbora eta lana eskatzen du. Etorkizunean berriro aztertuko dugu ekimena antolatzeko aukera, egungo formatuan edota etapa berriak ekar ditzakeen egoeretara egokituta".
Herritarrei begira, kongresuan parte hartzeko deia luzatu dute, "orain arte bezala edo ahal bada intentsitate handiagoarekin".
